Comezou a rodaxe da serie Motel Valkirias, chamada a proseguir os éxitos galegos nas plataformas
martes, 18 de xaneiro do 2022
Esta
semana comezou a rodaxe dunha serie galega con potencial para
converterse nun novo éxito da nosa industria nas novas canles de
contidos: Motel
Valkirias, producida por CTV e SPi e creada por Ghaleb Jaber
Martínez. Trátase, en palabras destas dúas firmas, “dunha
dramedia con toques de thriller que ao longo de oito
capítulos mestura drama, suspense, emoción e humor”. Motel
Valkirias, escrita por Patricia Müller e dirixida por Álex
Sampaio e Jorge Queiroga, con participación da TVG e a RTP (Radio e
Televisión de Portugal), ambiéntase nun motel transfronteirizo
entre Galicia e Portugal, onde conflúen tres mulleres con problemas
económicos e persoais e un cliente que carrexa “unha valiosa
mercadoría”.
Incluirá
oito capítulos de cincuenta minutos de duración e será gravada en
galego e portugués. A serie, segundo apuntan as produtoras, quere
converterse na primeira produción deste xénero “dunha recoñecida
plataforma audiovisual”, onde tamén se situará como a primeira
serie en galego. CTV conta neste senso co mellor dos precedentes: foi
pioneira en dar o seu apoio ás linguas cooficiais creando a serie en
galego O sabor das margaridas, emitida en Netflix, seguindo os
parámetros actuais que se están a desenvolver na futura Lei Xeral
de Comunicación Audiovisual.
Jaber
Martínez subliña que se trata dunha historia de “empoderamento
feminino e superación persoal” polo valor que amosan as tres
protagonistas. “A fazaña destas mulleres, que son quen de rachar
co pasado para conquistar o seu futuro, fai que nos sintamos atraídos
por elas e identificados coas súas decisións. Ademais xogamos
visualmente cun imaxinario colectivo moi recoñecible en calquera
parte do mundo: as fronteiras. Todos estes son compoñentes que a
converten nunha historia universal”, tal como agrega.
Para
acadar a máxima repercusión arredor deste serie, CTV e SPi uniron
forzas a prol “dunha estratexia de distribución internacional”.
Esta orientación empresarial xa foi probada con éxito por CTV en
series galegas como O sabor das margaridas (CTV) ou Auga
Seca (SPi). Agora, Motel Valkirias “quere seguir
exportando ao mundo o potencial de Galicia, neste caso o da provincia
de Ourense, e Portugal como escenario privilexiado para o
desenvolvemento da produción audiovisual, tanto pola súa
infraestrutura técnica e artística, como polas súas paisaxes e
localizacións”, conclúen ambas produtoras.