Compostela Monumental achega 15 cursos de teleformación tecnolóxica para autónomos

A Asociación de Comerciantes e Empresarios Compostela Monumental pon a disposición dos autónomos un total de 15 cursos gratuítos na modalidade de teleformación. Esta completa axenda de actividades, case todas elas centradas en ámbitos específicos das Tecnoloxías da Información e a Comunicación (todos de utilidade para mellorar a competitividade, a xestión, a publicidade, o alcance e a eficiencia dos negocios) permitirán ás persoas que se inscriban “poder formarse desde calquera sitio con acceso a Internet e ao ritmo e horario que mellor se adecúe á súa situación laboral e persoal”, informou a patronal da contorna histórica compostelá.
As inscricións nas diferentes actividades pode facerse por correo electrónico. Os cursos son totalmente gratuítos ao estar financiados polo Servizo Público de Emprego Estatal (SEPE), APE Galicia, Maude Studio e Compostela Monumental.
A temática e cursos programados son os seguintes:
- Sistema de I+D+i e a xestión da innovación.
- Negocios online e comercio electrónico.
- Educación da voz e control da tensión na atención telefónica.
- Creación, programación e deseño de páxinas web.
- Estratexias de servizos: calidade e orientación ao cliente.
- Selección e formación do equipo comercial.
- Xestión do tempo.
- Internet, redes sociais e dispositivos dixitais.
- Fundamento do plan de mercadotecnia en Internet.
- Analítica web.
- Técnicas de vendas telefónicas en telemarketing.
- Dirección por obxectivos e xestión do desempeño.
- Previsión e planificación de persoais.
- Selección na rede.
- Comunicación telefónica e atención ao cliente en telemarketing.