Compostweets pechou a súa segunda edición casando con acerto as moitas faces do social media

luns, 27 de febreiro do 2012 Marcus Fernández

JPEG - 55.6 KB
Apertura do evento retratada por David Serantes

O pasado sábado tivo lugar no Centro de Novas Tecnoloxías de Galicia (Santiago de Compostela) a segunda edición do encontro anual de social media Compostweets, que pese ás limitacións económicas propias dos tempos que corren, conseguiu reformularse como un evento tan enriquecedor como participativo no que os asistentes puideron reflexionar sobre a situación actual das redes sociais e coñecer distintos proxectos galegos ao redor deste novo contorno comunicativo.
Preto dun par de centos de persoas xuntáronse así para interactuar no mundo físico e falar de temas máis propios da virtualidade, pondo cara a xente que coñecían só na Rede e descubrindo numerosos proxectos interesantes, nun ambiente moi distendido. Pero máis aló das relacións que foron xurdindo entre os asistentes, o evento tamén gozou dun programa tan modesto como efectivo, que partiu dunha conversa entre Marcus Fernández e José Luis Orihuela, autor do blog eCuaderno e de libros como Mundo Twitter e 80 claves sobre el futuro del periodismo, reflexionando sobre as redes sociais dende moitos ángulos. O profesor Orihuela quixo así desbotar o mito do número de seguidores en Twitter ou Facebook, destacando que é máis importante a calidade que a cantidade, así como a conversa establecida entre os mesmos; aclarou que os medios de comunicación están a mudar constantemente conforme xorden outros novos (en vez de morrer, como se empreñan en repetir certos apocalípticos); quitou importancia aos temas do momento en Twitter definíndoos como “un esbirro social”; tamén amosar o contraste entre as amizades no mundo real e na Rede, sendo esta última un mero “acordo temporal para compartir información”; e, en definitiva, lanzou numerosos temas para chamar á reflexión aos presentes sobre o fenómeno que está a forzar a un cambio constante no xeito de comunicarnos, tanto de xeito público como privado.

JPEG - 103.6 KB
Raquel Lemos explicou a súa experiencia como Publiwoman

O primeiro bloque de intervencións da mañá completárono un par de mesas nas que puidemos ver, por unha banda ao xornalista Carlos Toural presentando á empresa galega BuyDeal e a Raquel Lemos Publiwoman, e por outra, a Anna García presentando á blogueira Nela Bernal, autora de A Fervenza do Sur e ao boneco viaxeiro Stabri, quen roubou o corazón aos presentes. Nestas intervencións destacaron especialmente a orixinalidade feminina de Raquel Lemos e de Nela Bernal, unha por ser unha publicista que se vende a si mesma como marca dun xeito moi divertido e igualmente efectivo, e outra por abordar o tema da sexualidade a través dun blog en galego.

JPEG - 104.3 KB
Álex Pereira narrou a súa experiencia como Coachinero

O resto da mañá podería considerase como un bloque destinado a activar os estómagos do público, pois comezou coas presentacións de Álex Pereira, autor do blog sobre nutrición, cultura gastronómica e creatividade El Coachinero, e a plataforma de venda en liña de “marisco a prezo de pizza” Elmarisconoescaro.com, para pasar logo a que os responsables de FBI (BAP&Conde) desen conta da popular campaña publicitaria de Gadis baixo o lema de Vivamos como Galegos. Completou esta face publicitaria unha recompilación cos mellores vídeos virais e campañas en liña de Galicia durante o ano 2011, prometendo dar continuidade a tal sección do Compostweets durante a sucesivas edicións.
Xa pola tarde púidose ver a presentación dun par de proxectos galegos como son a plataforma de desenvolvemento de aplicacións móbiles para eventos Bits for Meetings (B4M), da que a cuarta parte dos presentes estaban a dar boa conta da súa eficacia, pois o evento contaba cunha app deste tipo; e tamén Luz Castro (Imaxin Software) deu conta dun dos proxectos máis significativo da súa empresa, o tradutor Opentrad.

JPEG - 101.4 KB
David Serantes e Javier Pedreira Wicho abordaron o fenómeno dos blogs dun xeito tan amplo como divertido

Tras esta breve presentación chegou un dos pratos fortes do evento, unha conversa entre os blogueiros David Serantes e Javier Pedreira Wicho, que partía do título Microsiervos: de la Tierra a la Luna... en un blog, como desculpa para facer un repaso dos fenómeno dos blogs empregando como exemplo a Microsiervos.com. Unha hora chea de comentarios xeniais, que provocaron un tráfico de mensaxes a través de Twitter realmente impresionante, como reflexo da importancia que dan os entusiastas do 2.0 as reflexións destes grandes comunicadores que souberon gañarse ao auditorio co seu humor e as súas experiencias. Wicho explicou a historia do blog Microsiervos dende os seus inicios como un proxecto entre amigos, repasou detalles que causaron certa polémica no seu momento (como a publicidade nos blogs ou os comentarios que asegurou que “están sobrevalorados”) e mesmo narrou a súa visita á NASA para ver o lanzamento do derradeiro transbordador espacial. David Serantes achegou unha visión un tanto distinta, que destacaba polo feito de ter un podcast, medio de comunicación un tanto alternativo do que non houbera precedentes no Compostweets.

JPEG - 101.4 KB
Javi Rocamora foi un dos conductores do último tramo do Compostweets

Para pór o peche ao evento, os consultores Francesc Pumarola e Javi Rocamora reservaron un espazo para dar a coñecer a distintos proxectos de empresas con certa vertente tecnolóxica durante 5 minutos cada unha, o que aproveitaron dende a plataforma editorial híbrida Meubook, a tenda en liña Exquisitec.es, a rede social profesional Vigiliam, o proxecto de venda grupal (en desenvolvemento) Mundo de Planes, o novo proxecto para transformar ideas en negocios de Juan José Romero, e incluso unha proposta persoal, coa fotógrafa 2.0 Julia Antonio, que seguindo os pasos de Publiwoman, acudiu ao evento para venderse.
Pechouse así un encontro que parece consolidarse, en boa medida por saber adaptarse ao tempos que corren, polo que a meirande parte dos participantes quedaron con ganas de máis, prometendo repetir en futuras edicións.

JPEG - 466.4 KB
Francesc Pumarola acompañou a Javi Rocamora na presentación de distintos proxectos galegos durante a xornada
JPEG - 108.1 KB
A Fervenza do Sur púxolle un divertido toque erótico á xornada
JPEG - 697.9 KB
Camilo Ameijeiras e Luz Castro presentaron Bits for Meetings e Opentrad respectivamente
JPEG - 102.8 KB
David Serantes puxo un toque de humor e complicidade durante a súa intervención
JPEG - 116.8 KB
Wicho explicou a súa experiencia blogueira
JPEG - 94 KB
Juan José Romero presentou a súa última aventura empresarial
JPEG - 96 KB
Meubook amosou a súa proposta innovadora no Compostweets
JPEG - 179.5 KB
A plataforma social corporativa Vigiliam deu a coñecer o seu potencial neste evento en Compostela
JPEG - 94.6 KB
Exquisitec.es presentouse como unha interesante aposta pola calidade
JPEG - 118.5 KB
Mundodeplanes.com é un proxecto que nace dende Ribeira e do que pronto veremos froitos
JPEG - 108.4 KB
Julia Antonio propúxose como fotógrafa 2.0 no evento
JPEG - 144.8 KB
Alfonso Freire, organizador do evento, intentando captar algúns momentos do Compostweets dende un tablet
JPEG - 142.9 KB
O fotógrafo Manu Dibuja retratou ao boneco Stabri como a estrela do evento que foi

PUBLICIDADE