Concepción Pombo convértese na primeira directora xeral da CSAG

Concepción Pombo Romero foi proclamada esta mañá polo plano do Parlamento galego nova directora xeral da Corporación de Servizos Audiovisuais de Galicia (CSAG), nova denominación da CRTVG. A xornalista, con raíces en Val do Dubra e licenciada en Ciencias da Información pola Universidade de Santiago de Compostela, substitúe no cargo a Alfonso Sánchez Izquierdo, que o ocupaba dende 2009 e se atopaba en funcións dende 2015.
Pombo, que dende 2017 estaba á fronte da área de Información e Documentación do ente público, foi a única candidata presentada e contou co apoio do PPdeG, que a propuxera o pasado mes de maio. O seu nomeamento foi aprobado nunha terceira e definitiva votación no Parlamento galego, cun resultado de 39 votos a favor (todos dos populares) e 34 en branco, xa que non era posible votar en contra. En primeira volta precisábanse dous terzos da Cámara (50 votos) e en segunda, tres quintos (45), polo que só agora, cunha maioría absoluta, se puido desbloquear a designación.
As críticas da oposición foron contundentes. O BNG acusou o PP de acelerar « facerse co control absoluto dos medios públicos galegos», asegurando que Pombo é, dende 2018, «responsable da manipulación informativa» na CRTVG e advertindo de que « a é case imposible diferenciar o argumentario do PP das escaletas do telexornal».
Pola súa banda, o PSdeG lamentou o que consideran o pasamento da CRTVG, coa perda da pluralidade, a liberdade e o servizo público do ente que agora dirixiría Alfonso Rueda dende o seu despacho.
Fronte ás críticas, Pombo reivindicou a súa traxectoria e comprometeuse a impulsar unha nova etapa con máis presenza do galego, contidos máis próximos e pegados á realidade social, e a fortalecer o vínculo coa audiencia e a participación cidadá.