Constituída a demarcación galega do Colexio de Enxeñeiros Técnicos de Telecomunicacións

Esta semana constituíuse o Colexio Oficial de Enxeñeiros Técnicos de Telecomunicacións de Galicia, o COETTGA, a nova demarcación do Colexio Oficial de Enxeñeiros Técnicos de Telecomunicación (COITT), con José Manuel Martínez Pérez como decano. Coa creación deste novo colexio, segundo fixeron saber os membros da directiva, “apóstase pola descentralización das institucións e dos entes representativos dos profesionais de Enxeñaría de Telecomunicación”.
O acto contou coa presenza, apoio e colaboración dun importante número de compañeiros e representantes doutras demarcacións do COITT, entre os que se atopaban Sebastián Suárez Cano, decano do COITT de Canarias e responsable da organización territorial do colexio, José Antonio López Olmedo, presidente de AEGITT, e José Javier Medina, decano do COITT de Castela A Mancha.
A cita, tematicamente, xirou arredor da iniciativa +Colexio, segundo declaracións de Martínez Pérez “un referente de colaboración que engloba a importancia de sermos un equipo, de manter firme a unidade, a cooperación e o traballo continúo para a defensa das enxeñeiras e enxeñeiros técnicos en Telecomunicación, os seus intereses e os da profesión, co fin de reforzar e impulsar o valor dos seus proxectos como unha oportunidade de transformación e innovación para a sociedade”.
Durante as diferentes intervencións fíxose fincapé na capacitación da profesión, así como no importante papel que ten na nosa sociedade. Salientouse tamén “a forza que alcanza a descentralización dos servizos do COITT cara aos diferentes territorios, contribuíndo así a dar visibilidade á capacidade e profesionalidade dos ITT das diferentes Comunidades Autónomas do ámbito estatal, así como aos proxectos postos en marcha”.
Amais, fíxose fincapé nun dos grandes cometidos da nova xunta directiva: dar visibilidade, impulso e proxección ao talento das enxeñeiras e enxeñeiros de Galicia, así como fomentar a diversificación de proxectos.
A andaina do COETTGA arrancará fomentando a a diversificación de proxectos de tecnoloxía de cadea de bloques (Blockchain), 5G, Big Data, ciberseguridade, turismo dixital, Internet das Cousas (IoT), drons e Cidades Intelixentes (Smart Cities). A xunta directiva está conformada por:
· José Manuel Martínez Pérez, decano.
· David Saavedra López, vicedecano.
· Patricia Agrelo Rivas, secretaria.
· José Carlos Rodríguez Varela, tesoureiro.
· Diego Pérez Codeiro, vogal.
· Sergio Eiriz Rey, vogal.
· Roberto Oliveira Castro, vogal.
· Xóse Miguel Pérez Blecua, vogal.