Contacnova botará luz na Tecnópole sobre as potencialidades de xestión dos centros de contactos
luns, 27 de xaneiro do 2014
Seguen adiante as actividades dos Mércores de
Tecnópole, un ciclo dirixido a facilitar aos nosos profesionais
e empresarios a posibilidade de actualizaren os seus coñecementos
sobre innovación, mercadotecnia e servizos tecnolóxicos postos en
marcha para seren máis competitivos e eficientes. O ciclo, que vén
da man da Tecnópole de Ourense, actualízase á súa vez con novos
puntos de vista sobre a materia prima TIC da que podemos botar man.
Sen ir máis lonxe, este 29 de xaneiro celébrase no dito complexo
empresarial unha
sesión sobre as potencialidades cos contact center como
ferramentas de xestión. A cita vén da man de Contacnova,
máis polo miúdo do seu responsábel de desenvolvemento de negocio,
Rogelio García.
A firma galega Contacnova, da
que temos falado dende Código Cero con motivo do seu labor de
seguimento e análise en procesos electorais, exporá na cita
deste mércores as tendencias no seu sector e presentará as opcións
de cooperación que a empresa ten abertas para proxectos conxuntos
con outras empresas. Contactnova, pertencente ao Grupo Netaccede,
conta cunha traxectoria de máis de dez anos na prestación de
servizos de outsourcing especializados en solucións de
mercadotecnia, atención telefónica, atención ao cidadán, apoio á
xestión e consultoría estratéxica e telefónica. Segundo informa a
Tecnópole na súa web, Contacnova “dispón dos sistemas máis
avanzados de comunicación e emprega as últimas e máis potentes
tecnoloxías, ofrecendo aos seus clientes un servizo coa máxima
calidade e garantía”. Tamén lembra a Tecnópole que a
arquitectura CTI (Computer-Telephone Integration) de Contacnova
permítelle “amplas funcionalidades en resposta de voz interactiva
(IVR), distribución automática de chamadas (ACD) e sistemas de
marcación progresiva”. A empresa galega dá servizo a firmas de
sectores tan dispares como a enerxía, a moda ou o motor, achegando
tamén recursos á Administración galega, para a que xestiona os
servizos de Atención á Muller e de Información ao Cidadán 012,
entre outros. A cita con Contactnova será o día 29 ás 12 horas na
terceira planta do Edificio CEI de Tecnópole. Para asistir só hai
que inscribirse na web
do Parque Tecnolóxico de Galicia.