Contact mostra ás empresas da Tecnópole e San Cibrao as vantaxes da dixitalización
venres, 6 de abril do 2018
- César González, director executivo de Contact Comunicación
O vindeiro 18 de abril, hai
unha cita na Tecnópole sobre as vantaxes da dixitalización e os
procesos para acadala plenamente. A cita, dirixida a
empresarias/os da Tecnópole e do Polígono de San Cibrao das Viñas,
virá con feitura de almorzo tecnolóxico e nel os participantes
terán a oportunidade de coñecer até que punto a innovación
dixital, no seo das súas empresas, pode ser un ingrediente
importante (e nalgúns casos crucial) para a competitividade, a
rendibilidade, o espallamento internacional, a optimización e o
crecemento.
A persoa encargada de impartir a sesión será
César González, director executivo (CEO) de Contact
Comunicación, empresa local responsábel de senlleiros
desenvolvementos tecnolóxicos, como por exemplo Orama, unha
innovadora ferramenta de promoción socio-cultural que aposta,
precisamente, pola dixitalización, a dispoñibilidade e a
ubicuidade. González, na súa intervención, mostrará as fórmulas
máis axeitadas para que as PEME poidan captar novos clientes a
través da modernización TIC dos seus negocios. Estes procesos,
adianta o responsábel de Contact, “permiten crear un ecosistema
que axuda á empresa a estar presente en todas as fases da venda”.
O almorzo, que terá lugar o mércores 18 de abril
a partir das 9.30 no Edificio CEI, está aberto
a inscrición gratuíta.
Esta serie de almorzos tecnolóxicos enmárcase no
obxectivo de Tecnópole de contribuír a promover activamente a
competitividade das súas empresas e centros tecnolóxicos. Este
formato de participación reducida procura, en palabras da Tecnópole
“a actualización de coñecementos sobre temas legais,
administrativos, comerciais ou relativos a tendencias do mercado” e
concíbese “como un espazo de relación entre as empresas do Parque
entre elas e con outras, xa sexa en termos de contactos comerciais ou
para o inicio de proxectos de innovación conxuntos”.