Convocada a quinta edición dos Premios Emprende Gaiás-Sixto Seco
luns, 4 de setembro do 2017
Fortalecer o chan que pisan as/os emprendedoras/es
creativas/os. Este
é un dos grandes obxectivos dos Premios Emprende Gaiás-Sixto Seco,
que veñen de chegar á quinta edición da man da Fundación Cidade
da Cultura de Galicia. Segundo fan saber os impulsores do
certame, trátate dun “concurso de ideas e proxectos innovadores co
que dar apoio aos emprendedores e dinamizar as industriais culturais
galegas”. A iniciativa, que desta volta conta co respaldo do IGAPE,
diríxese a impulsar proxectos dos seguintes eidos de acción (tres
modalidades): aplicacións informáticas ou proxectos culturais en
Internet, propostas na área do deseño, creación artística e
plástica e na área da xestión cultural.
O recoñecemento en cada unha das categorías será
a incorporación de balde durante doce meses ao Centro de
Emprendemento do Gaiás, onde os responsábeis das novas iniciativas
de mercado contarán cun asesoramento personalizado e un premio en
metálico de 2.000 euros para contribuír ao financiamento de cada
proxecto (grazas á devandita colaboración do IGAPE).
Segundo explican os impusores do certame, nel
teñen cabida deseñadores-ilustradores, profesionais da
comunicación, produtores, xestores culturais, programadores de
aplicacións informáticas e de proxectos culturais na internet e
calquera outra persoa con vencellos no emprendemento cultural.
Esta quinta convocatoria está destinada a
titulados de ciclos medios e superiores de Formación Profesional e
das ensinanzas profesionais de artes plásticas, titulados e
diplomados de escolas de arte, licenciados e diplomados
universitarios en humanidades e/ou calquera outra rama artística e
calquera outra persoa licenciada ou diplomada con ligazóns
emprendemento cultural e que desexen desenvolver a súa actividade na
Cidade da Cultura.
Xunto coa solicitude de participación, os
interesados deberán presentar os seus traballos e documentación
acreditativa da súa formación á Fundación Cidade da Cultura de
Galicia. Tanto as bases do concurso como a solicitude de inscrición
están dispoñibles na páxina web da Cidade da Cultura e no portal
da Xunta de Galicia.
Á hora de avaliar os proxectos terase en conta
(por orde de importancia) a aplicación industrial ou comercial de
resultados de investigación científica; o desenvolvemento dun novo
método de produción ou de organización dos recursos produtivos; a
creación de invencións ou deseños industriais innovadores; e a
aplicación de innovacións en invencións ou deseños industriais,
de embalaxe ou deseño gráfico de produtos tradicionais que
“melloren dun xeito significativo a súa competitividade no
mercado”.
Desde a posta en marcha en 2013 dos primeiros
Emprende Gaiás-Sixto Seco, once empresas do ámbito cultural e dos
contidos dixitais comezaron a desenvolver a súa actividade no Centro
de Emprendemento da Cidade da Cultura.
Os premios Emprende Gaiás-Sixto Seco homenaxean a
figura do médico e intelectual galego Agustín Sixto Seco, quen
participou (alén da súa actividade no ámbito da saúde) desde a
década dos 70 en proxectos editoriais como Galaxia, en padroados
como o de Rosalía de Castro e da Fundación Otero Pedrayo, así como
en institucións como Penzol, Castelao, Camilo José Cela e o Museo
do Pobo Galego.