Corel Club sortea cinco entradas para a Campus Party 2010
luns, 5 de xullo do 2010
O Corel Club vén de informar da súa intención de tirar partido da Campus Party de Valencia para ampliar o coñecemento e a capacidade de innovación da comunidade de usuarios desta plataforma. E farao convidando a cinco creativos á devandita xuntanza, prevista para o día 29, que inclúe no seu programa un relatorio de Oliviero Toscani, o fotógrafo e deseñador responsable das campañas máis salientables de United Colors of Benetton, Chanel ou Valentino.
Deste xeito, informa o Corel Club, quen desexe acudir a esta “cita imprescindible co mellor deseño gráfico” e escoitar de primeira man os “orixinais puntos de vista de Toscani sobre o futuro da creatividade” poderá facelo ao participar no sorteo de 5 entradas de mobilidade entre os usuario que até o 6 de xullo publiquen algunha mensaxe no Corel-FORUM e fagan un seguimento da cuestión no Twitter.
Por certo que as entradas permitirán acceder á Campus Party (un dos meirandes eventos colectivos do mundo nos eidos da tecnoloxía e o lecer) tódolos días, incluíndo un pase para o emprazamento da acampada.
