Coremain participa nun proxecto para facilitar misións críticas de emerxencia dende o ar
martes, 5 de xullo do 2016
A empresa
galega Coremain, emprazada no Polígono de Costa Vella de Santiago, é
unha as impulsoras e participantes do Proxecto Enxame (Proyecto
Enjambre), unha iniciativa estatal para encamiñar e facilitar
misións críticas de emerxencia con medios aéreos tripulados (e non
tripulados) en voos cooperativos. Segundo fai saber a firma galega,
Enxame centrarase en tres prioridades da Estratexia de Seguridade
Nacional. Estas son: ordenación de fluxos migratorios, protección
ante emerxencias e catástrofes e seguridade marítima. Nestas áreas,
engádese, o sector privado pode dar soporte tecnolóxico ao ámbito
público, achegando innovadores servizos que faciliten a cooperación
entre ambas frontes. Cooperación para, por exemplo, encetar misións
críticas do xeito máis seguro, eficaz, eficiente, rendíbel e
sustentábel posíbel. Aquí entra en xogo, precisamente, Enxame.
Entre outras cousas,
encamíñase a facer máis doado e factíbel o uso de aparellos non
tripulados, complementando a situación actual (medios tripulados
para as misións de observación e posterior intervención) coa
introdución e afianzamento de novas e avanzadas tecnoloxías para o
voo e o control de aparellos, por exemplo a tecnoloxía RPA (Remotely
Piloted Aircraft, ou sexa vehículos aéreos que se gobernan
retomamente dende terra).
Segundo lembra Coremain,
o obxectivo concreto do proxecto é “o desenvolvemento dun novo
servizo de misións críticas de emerxencias onshore e
offshore, que permita a actuación cooperativa e segura de
aeronaves tripuladas e non tripuladas nun mesmo espazo aéreo,
dispondo de vehículos aéreos que desempeñen exclusivamente labores
de observación ao servizo das aeronaves tripuladas de intervención,
facilitando a toma de decisións durante as operacións”.
Grazas a este servizo
poderanse reducir os custos de investimento, operación e mantemento
das operacións, aumentando a cobertura e a eficiencia do servizo.
Enxame contará ás súas costas cun consorcio multidisciplinar
formado por Inaer, Coremain, PildoLabs, Álava Ingenieros e Temai, e
tamén por FADA-CATEC, UA, UCO, UPC E ULE. O proxecto abrangue catro
anos de traballo e conta un orzamento de 9,8 millóns de euros.