Coruña Gráfica analizou o impacto da IA nas industrias creativas

A sede da Asociación de Emprendedores de Galicia (ASCEGA) na Coruña acolleu esta tarde unha mesa de debate organizada por Coruña Grafica na que pretendíase analizar a implementación das intelixencias artificiais no mercado e o seu impacto nos sectores creativos.

O coloquio estaba conducido polo ilustrador e editor Manel Cráneo, e contou coa participación do enxeñeiro e escritor Xavier Alcalá, o ilustrador e humorista gráfico Santy Gutiérrez e o profesional da animación stop-motion Tomás Conde, achegando cadaquén visións diversas do tema a tratar, o que espertou grande interese por parte dos presentes, como ben se constatou na súa quenda de intervencións final.

Tecnoloxía útil

Pola súa banda, Tomás Conde (de Algarabía Animación) deixou claro que facía un uso profesional das intelixencias artificiais xenerativas, principalmente na fase de creación de personaxes, aproveitando o potencial das ferramentas existentes para axilizar o proceso de documentación e o de prototipado dos personaxes que rematarán plasmándose nas súas creacións. Ou sexa, que a IA pode verse como un apoio ao seu traballo.

Tecnoloxía inmadura

Por outra banda, Santy Gutiérrez centrouse no estado actual das intelixencias artificiais xenerativas, salientando o feito de que, por moito que o intenta, non consegue que os sistemas actuais sexan quen de crear o que el desexa facer, considerando que a tecnoloxía actual está aínda bastante lonxe de realizar creacións de auténtica calidade, principalmente pola falta de intención, ou sexa, que poderiamos entender que as creacións artificiais aínda están carentes do toque que lle dá un autor.

Gutiérrez asegura que, no estado actual da tecnoloxía, será bastante difícil que perigue o seu traballo, xa que seguirá a ser precisa a súa man para desenvolver as súas obras, así como tamén deixa caer que boa parte do traballo dos creadores cando atenden encargos é entenderse co cliente para ofrecerlle o que precisa aínda que este non saiba expresalo, rol que dificilmente podería ocupar unha IA, xa que ante ordes difusas non pode acadar resultados satisfactorios.

Terra de oportunidades

Xavier Alcalá, tras distintas disertacións, deixou claro que a IA era imparable, e considerou que non era o seu rol ter que falar da necesidade de regular a intelixencia artificial de cara aos creadores, senón que entende que esa será a preocupación de toda a xente que realmente se xoga o seu provir en función de como quede a situación. No que si quixo incidir con insistencia é no feito de que boa parte da tecnoloxía que move a intelixencia artificial funciona sobre grandes servidores, dos que incluso temos algún en Galicia, de aí que considera fundamental que se traballe para non quedar á marxe desa capa da IA. Pensa que é importante que se traballe para xogar un rol neste ámbito que está a medrar a grande velocidade, e que pode ser unha fonte de oportunidades.

Regulación necesaria

Para pechar a sesión, Manel Cráneo tivo a ben amosar unha pequena selección de exemplos de creacións realizadas mediante intelixencia artificial, así como unha serie de viñetas humorísticas sobre o tema, que ilustraban ben o tema analizado. Tamén quixo deixar clara a preocupación do sector das industrias creativas no rápido avance da IA e na necesidade de que exista unha regulación que impida abusos nun sector tan desprotexido tradicionalmente como o da creación.