Crean un dispositivo que axuda a evitar as multas por radares de tramo

Xusto cando os condutores e condutoras nos iamos acostumando a conducir coa vista posta no arcén das estradas a fin de detectar os radares camuflados e reducir a nosa velocidade de cruceiro para evitar sen sancionados, veñen os de tráfico e inventan os radares de tramo, que obrigan a estar continuamente pendente da velocidade que levamos e non baixar a garda en ningún momento.
Porén xusto no día que estes dispositivos saltan aos medios porque en Madrid empezan a sancionar por infraccións detectadas con este sistema de control de velocidade en túneles, vén Vexia e anuncia a saída ao mercado da súa tecnoloxía Radar Túnel para ter baixo control a velocidade nestes tramos.
O sistema empregado por Vexia funciona cunha tecnoloxía intelixente que controla o tempo que o noso vehículo pasa dentro dun determinado túnel, para logo, en función da velocidade que levemos, indicar en vermello, laranxa ou verde se é motivo de sanción ou non.
Deste xeito, o sistema avisa en vermello que debemos reducir a velocidade se non queremos ser sancionados; en laranxa se imos moi xustos e en verde se estamos efectuando o tramo no tempo axeitado.
O obxectivo desta ferramenta é axudarlle aos condutores a levar unha velocidade media correcta para non ter problemas coas multas e sobre todo, para evitar ter que facer unha freada de emerxencia e perder así o control do vehículo.