Cultura mellora o acceso en liña ao patrimonio documental dos Arquivos de Galicia
venres, 8 de xuño do 2012
A
Consellería de Cultura, Educación e Ordenación Universitaria vén de renovar a plataforma virtual dos Arquivos
de Galicia, a fin de mellorar a súa consulta en liña e facilitarlle a busca
de información aos seus usuarios e usuarias.
Esta
web, que xa fora posta en marcha pola Xunta en 2004, tivo que renovarse para
adaptarse ás novas demandas da cidadanía, así como ás ferramentas tecnolóxicas
que hai agora no mercado e que permiten un mellor acceso aos contidos que
achega, considerados de interese público.
Xa que
logo, a nova ferramenta ofrece un acceso integrado aos sitios específicos de
cada arquivo, “facilitando a busca de
información mediante unha estrutura común”, afirman os seus
desenvolvedores.
- O secretario xeral de Cultura, Anxo Lorenzo, na presentación do novo portal web
A
presentación da nova web, que tivo lugar esta mesma mañá na Cidade da Cultura,
enmarcouse nos actos de celebración con motivo do Día Internacional dos
Arquivos, que se celebra mañá, día 9 de xuño, en todo o mundo.
Sumándose
a esta conmemoración, a Secretaría Xeral de Cultura tamén promoveu a tradución
ao galego da Declaración Universal sobre os Arquivos, versión que se pode consultar,
en exclusiva, na web do Consello
Internacional de Arquivos.
A todo
isto hai que sumarlle a intención da Consellaría de dixitalizar todos cantos
arquivos e documentos sexa posible, a fin de facilitar a conservación e
mellorar a súa difusión.
Para
avanzar nesta dirección, a Consellería de Cultura e Educación ten diversos
espazos de colaboración abertos con outras entidades, entre os que destaca a
colaboración coa Fundación Penzol para a dixitalización do seu patrimonio
documental e bibliográfico, e co Arquivo Histórico da Universidade de Santiago de
Compostela, para avanzar na dixitalización dos seus fondos.
Os seus
responsables tamén destacan as actividades que realizan en colaboración co Cabido
da Catedral de Santiago “que han permitir
avanzar na dixitalización das áreas de documentación moderna e medieval”,
informan, mailo proxecto de organización, informatización e restauración de
fondos do arquivo diocesano e catedralicio do Bispado de Tui-Vigo.