Cyberpunk 2077 por fin aproveita a potencia das consolas de nova xeración

O lanzamento de Cyberpunk 2077 foi un dos máis decepcionantes da historia dos videoxogos, ao estar o xogo claramente sen rematar, con multitude de fallos que facían incluso imposible rematar as partidas e cun rendemento en consolas da anterior xeración tan malo que incluso provocou que Sony expulsase o xogo da PlayStation Store até o pasado mes de xuño.
Agora, máis dun ano despois do lanzamento oficial, o xogo reciben unha importante actualización nas versións de consola, que supón que por fin aproveitan o hardware de Xbox Series X|S e PlayStation 5, o que fai que o xogo en consolas estea á altura da versión para PC, con ray tracing para as sombras locais, melloras visuais, reaccións das multitudes melloradas e soporte para auriculares con son espacial.
Os usuarios de consolas de nova xeración poden elixir agora entre gozar dun modo de xogo no que se dea prioridade ao rendemento ou a un modo con ray tracing no que os gráficos melloran substancialmente en realismo e calidade.
Aparte dun rendemento moi superior en novas consolas, a última actualización inclúe moitos cambios, de xeito que parece bastante atinado dicir que o parche 1.5 de Cyberpunk 2077 é o máis parecido que temos ao que tería que ser o xogo no seu lanzamento, e para demostralo, até o 15 de marzo estará dispoñible unha versión de proba do xogo para consolas Xbox Series X|S e PlayStation 5, que permite xogar durante 5 horas sen ter que pasar por caixa, para que os xogadores poidan comprobar en primeira persoa que o produto xa está pulido. De feito, para facer máis doada a decisión de compra o título está actualmente de oferta a 24,99 euros para PS4/PS5 e a 34,99 euros para Xbox One/Xbox Series X|S.
Nas vindeiras semanas verase se realmente o xogo paga a pena e CD Projekt Red consegue consolidar a franquía Cyberpunk para poder lanzar novas entregas no futuro, aínda que é máis probable que volvan antes a franquía de The Witcher da que tanto proveito tiraron no pasado (de feito, está previsto que en poucos meses estreen versión de The Witcher III para consolas de nova xeración).