DaVinci Resolve terá versión para iPad en poucas semanas

O anuncio da renovación do iPad Pro para incorporarlle un procesador M2 deixábase caer que habería versión da coñecida aplicación de edición de vídeo DaVinci Resolve para iPad, e finalmente Blackmagic Design confirma que a aplicación estará dispoñible como descarga de balde antes de rematar o presente ano, incluíndo compras na aplicación para desbloquear funcións avanzadas.
DaVinci Resolve para iPad permitirá aos creadores de contido levar os seus fluxos de traballo a novas localizacións, conta cunha interface adaptada tanto a un control multitáctil como ao Apple Pencil, e incluso inclúe soporte para a nube do fabricante, permitindo así a colaboración con múltiples usuarios espallados polo mundo.
A aplicación está optimizada para procesadores Apple Silicon, de xeito que pode empregarse nos iPad Pro con M1 ou M2 (conseguindo neste último un rendemento moi superior á hora de procesar vídeos ProRes en ultra alta definición), e incluso permite amosar os vídeos cos que se traballe de xeito limpo nunha pantalla externa (como un Apple Studio Display, un monitor Pro Display XDR ou unha pantalla compatible con AirPlay) facendo así máis áxil o traballo coas cores dende o iPad.
Os proxectos creados con DaVince Resolve para iPad son compatibles co DaVinci Resolve de escritorio, soportando tamén ficheiros en formatos como H.264, H.265 Apple ProRes e Blackmagic RAW, que poden importarse ao almacenamento interno do iPad Pro ou empregarse en iCloud ou en unidades externas conectadas por USB-C.
Cómpre salientar que a aplicación está optimizada para o iPad Pro con pantalla de 12,9 polgadas, nos que é capaz de tirar proveito do HDR, precisando para funcionar iPad OS 16 ou superior.