Darth Vader regresa a Fortnite con voz xerada por IA

Fortnite volve sorprender coa reaparición dun dos viláns máis emblemáticos do cinema: Darth Vader. O personaxe da saga Star Wars regresa como xefe en Battle Royale, substituíndo á versión samurai, e faino cunha novidade sen precedentes: agora é posible falar con el usando a voz e recibir respostas xeradas por intelixencia artificial.
Esta funcionalidade experimental permite aos xogadores planear estratexias co Lord Sith mediante comandos de voz. Vader responde a calquera pregunta sobre a Forza, o Imperio Galáctico ou tácticas para alcanzar o último círculo da tormenta. Para activalo, abonda con premer o botón especial que aparece na pantalla cando está dispoñible.
Epic Games explica que esta opción é posible grazas aos modelos de IA Gemini 2.0 Flash de Google e Flash v2.5 de ElevenLabs. A voz que emprega Vader nesta versión está baseada na de James Earl Jones, quen lle deu identidade sonora nas películas orixinais e cuxo legado permanece vivo grazas á colaboración da súa familia.
Nun comunicado, os seus achegados lembran que «para James Earl, a voz de Darth Vader non podía separarse da historia de Star Wars» e amosan o seu desexo de que fans de todas as idades poidan seguir gozando da experiencia. Agardan que esta colaboración con Fortnite axude a manter viva a esencia do personaxe.
Cómpre salientar que este tipo de iniciativas non están libres risco e, por exemplo, ao pouco de estrearse a síntese de voz de Darth Vader en Fortnite houbo usuarios que conseguiron que dixese groserías, aínda que os responsables do xogo rapidamente implementaron medidas para evitar ese tipo de comentarios.