Dativic, referente en produtos de impresión 3D, recibe a visita da directora de GAIN
xoves, 27 de xaneiro do 2022
A
empresa Dativic, con sede en Nigrán e centrada no subministro
profesional de produtos de impresión 3D e fabricación aditiva,
recibiu
este xoves 27 de xaneiro a visita da directora da Axencia Galega de
Innovación (GAIN), Patricia Argerey, quen destacou o carácter
innovador dunha compañía, que, segundo lembrou, conta con apoio da
Xunta para contratar persoal mozo para a realización de actividades
de I+D+i. Tamén enxalzou o espírito investigador da empresa,
“sempre á procura de novos produtos e materiais”.
Patricia
Argerey tamén recordou que segue aberto ata o 3 de febreiro o
programa Investigo da Consellería de Emprego e Igualdade, no marco
do Plan de Recuperación, Transformación e Resiliencia e financiado
con fondos europeos Next Generation. Este programa, cun orzamento de
13,1 millóns de euros, apoiará a contratación durante 12 meses a
xornada completa de ata 585 persoas menores de 30 anos demandantes de
emprego na realización de iniciativas de investigación e innovación
nas universidades públicas, organismos de investigación, centros
tecnolóxicos, parques científicos e empresas que invistan en I+D+i.
O importe unitario das axudas oscilará entre os 22.405,94 e os
33.108,92 euros en función do número de persoas que se van
contratar, o grupo de cotización e o ano de contratación.
Dativic
Creada
en 2013, a empresa Dativic, distinguida no seu día pola iniciativa
de comercio electrónico filament2print.com,
participou na aceleradora ViaGalicia (Zona Franca de Vigo) e acadou o
recoñecemento ao mellor ecommerce de Galicia no ano 2017.
Actualmente, vende en máis de 90 países e conta con máis de 15.000
clientes por todo o mundo. A súa aposta pola internacionalización e
a innovación é fundamental, segundo sinalan os seus impulsores,
“para poñer sempre ao alcance do mercado as últimas innovacións
en canto a produtos de impresión 3D”.
