David Lago (IES Pedro Floriani de Redondela), 3º clasificado e medalla de ouro na Olimpíada Informática Española

David Lago recollendo o premio. Foto da Universidad de Valladolid-UVA.

A XXX Olimpíada Informática Española (OIE) celebrouse esta fin de semana na Escola de Enxeñaría Informática da Universidade de Valladolid e contou coa participación de 42 estudantes de todo o territorio estatal, seleccionadas/os entre os mellores talentos en programación. Trátase dunha competición de programación algorítmica destinada a estudantes de ensinanza secundaria e bacharelato de toda España. O seu obxectivo é fomentar o talento en informática e a resolución de problemas computacionais, preparando aos mozos e mozas para retos académicos e profesionais de alto nivel.

Nicolás Freiría, cuarto pola dereita. Foto da Universidad de Valladolid-UVA.

O gañador da Olimpíada Informática Galega (organizada polo Colexio Profesional de Enxeñaría en Informática de Galicia, o CPEIG, e as tres universidades galegas), David Lago Alonso, estudante de 2° Bacharelato no IES Pedro Floriani de Redondela, foi o terceiro clasificado da Olimpíada Informática Española, conseguindo unha medalla de ouro na clasificación.

David Lago e Nicolás Freiría. Foto de Diego Seco, profesor da UDC.

O segundo participante galego, Nicolás Freiría Casal, estudante de 2° Bacharelato do IES Ribeira de Louro do Porriño, estivo preto das medallas alcanzando o posto 19 da clasificación e recibindo unha mención.
Os catro primeiros clasificados (as medallas de ouro, entre eles David Lago) compoñerán a delegación española que participará na Olimpíada Informática Internacional, que se celebrará do 9 ao 16 agosto en Uzbekistán.