Dell incorpora ao seu catálogo un novo Tablet PC

A pantalla táctil do equipo funciona tanto cunha stylus coma cos dedos

Os Tablet PC son unha tipoloxía de equipamentos informáticos que parecían extintos coa chegada dos tablets e dos ultraportátiles, pero seguen entre nós, e como demostración achégannos o novo Dell Latitude XT3, que funciona con procesadores Intel Core i3/i5/i7, ata 8 Gb de RAM, gráfica Intel HD Graphics 3000 e unha pantalla multi-táctil de 13,3 polgadas cunha resolución de 1.366 x 768 píxeles que pode xirar sobre si mesma e abaterse para transformar o equipo de ordenador portátil a tablet (podendo usarse tanto cos dedos como cunha stylus agochada no seu chasis).
O equipo pode configurarse con baterías de entre 3 e 9 celas (segundo a autonomía que precisemos), pode adquirirse con distintas opcións de conectividade (incluíndo banda larga móbil por 3G ou WiMAX), funciona con Windows 7, inclúe gravadora de DVD, Gigabit Ethernet, Bluetooth 3.0, 3 portos USB 2.0, 1 porto USB/eSATA, FireWire, lector de tarxetas de memoria, saídas VGA e HDMI, lector de pegadas dixitais... toda unha chea de prestacións encerradas nun corpo de 323 x 221,7 x 30,9 milímetros que pesa 2,02 quilos (cunha batería de 6 celas), polo que ten unha mobilidade aceptable para un dispositivo das súas prestacións, aínda que teno difícil para competir cos tablets puros, que son moito máis manexables. O seu prezo parte dos 1.789 dólares (1.259,46 euros).