Denuncian a TikTok por non respectar a privacidade infantil nos EE.UU.

O Departamento de Xustiza dos EE.UU., en representación da Comisión Federal de Comercio, vén de demandar á plataforma de vídeos TikTok, á súa empresa matriz ByteDance, así como ás súas empresas afiliadas, por violar flagrantemente a Lei de Protección da Privacidade Infantil en Liña (COPPA) e tamén alega que infrinxiron unha orde de consentimento da FTC de 2019 contra TikTok por violar a COPPA.
A denuncia alega que os demandados non cumpriron co requisito da COPPA de notificar e obter o consentimento paterno antes de recoller e usar información persoal de menores de 13 anos.
«TikTok violou consciente e repetidamente a privacidade dos nenos, poñendo en perigo a seguridade de millóns de nenos en todo o país», dixo a presidenta da FTC, Lina M. Khan, ao que o subsecretario principal de Xustiza adxunto, Brian Boynton, engadiu que «esta acción é necesaria para evitar que os demandados, que son reincidentes e operan a gran escala, recollan e usen información privada de nenos pequenos sen ningún consentimento ou control paterno».
A denuncia sostén que ByteDance e as súas empresas eran conscientes das súas vulneracións da lexislación, e optaron por permitir o acceso a TikTok a menores de 13 anos. Incluso detallan que de media a verificación para comprobar se unha conta pertencía a un neno precisaba de entre 5 e 7 segundos, o que denota a falta de compromiso da compañía a este respeto.
Ademais, a denuncia alega que TikTok construíu portas traseiras na súa plataforma que permitían aos nenos eludir o control de idade destinado a filtrar aos nenos menores de 13 anos. Supostamente, TikTok permitía aos nenos crear contas sen ter que proporcionar a súa idade ou obter o consentimento paterno para usar TikTok utilizando credenciais de servizos de terceiros como Google e Instagram. TikTok clasificaba esas contas como contas de idade descoñecida, que medraron até millóns de contas, segundo a denuncia.
Mesmo cando dirixía aos nenos a usar o servizo TikTok Kids Mode, unha versión máis protexida para nenos, a denuncia acusa que TikTok recollía e usaba a súa información persoal en violación da COPPA.
Supostamente, TikTok tamén dificultaba que os pais solicitasen a eliminación das contas dos seus fillos. Cando os pais lograban navegar polos múltiples pasos necesarios para presentar unha solicitude de eliminación, TikTok a miúdo non cumpría esas solicitudes.
A denuncia tamén afirmaba que TikTok comezou a violar os termos da orde de 2019 da FTC pouco despois de que entrase en vigor. Dúas entidades de TikTok (anteriormente Musical.ly e Musical.ly Inc., que ByteDance adquiriu en 2017 e renomeou) acordaron os termos da orde para resolver as alegacións de que violaron a Norma COPPA recollendo ilegalmente información persoal de nenos menores de 13 anos.
Ademais, a denuncia alega que TikTok non conseguiu:
– notificar aos pais sobre todos os datos persoais que recollían dos nenos;
– obter o consentimento paterno para a recollida e uso deses datos;
– limitar a recollida, uso e divulgación da información persoal dos nenos; e
– eliminar a información persoal dos nenos cando os pais o solicitaban ou cando xa non era necesaria.
A denuncia pide ao tribunal que impoña sancións civís contra ByteDance e TikTok e que emita unha medida cautelar permanente contra eles para evitar futuras violacións da COPPA.