Denuncian ante o Defensor do Pobo os bloqueos masivos durante os partidos de fútbol

A Asociación de Internautas (AI), xunto coa Fundación España Dixital (FED) e a Asociación de Usuarios de Internet (AUI), presentaron unha reclamación formal ante o Defensor do Pobo para que inste á Secretaría de Estado de Telecomunicacións e Infraestruturas Dixitais e á Comisión Nacional dos Mercados e da Competencia a actuar de oficio contra os bloqueos indiscriminados que afectan á Rede cada fin de semana por orde da Liga Nacional de Fútbol Profesional.
Segundo denuncian, desde hai meses milleiros de páxinas web deixan de estar dispoñibles en España coincidindo coa retransmisión de partidos de fútbol, o que impide o acceso a contidos e servizos en liña de toda índole. Entre as plataformas afectadas atópanse a Real Academia Española, a plataforma de videoxogos Steam, varios medios de comunicación e mesmo o sitio web do Concello de Madrid. Estes bloqueos, segundo explican, escúdanse nunha orde xudicial que en ningún caso establece o bloqueo de páxinas web ou enderezos IP lexítimos non relacionadas co fútbol ou coa pirataría.
As tres entidades consideran que permitir esta situación supón unha validación por parte dos poderes públicos dunha vulneración de dereitos fundamentais recollidos na Constitución Española, como os artigos 9, 20.1 a) e d), 20.5 e 38. Critican que se están a causar danos a terceiros sen xustificación legal, unicamente para protexer intereses económicos privados.
«Sen ningún tipo de límite nin responsabilidade, esta empresa privada está conculcando os dereitos fundamentais de milleiros de internautas, tales como o dereito á liberdade de expresión, á liberdade de información e á liberdade de empresa, internautas que nada teñen que ver con supostas actuacións ilícitas ou ilegais que poidan afectar a dita empresa.», denuncian. E engaden que esta situación podería sentar un precedente perigoso para futuras intervencións privadas na Rede, algo que consideran inaceptable nun Estado de Dereito.