Denuncian irregularidades por parte da compañía de telefonía promovida por Bertín Osborne

Este mes naceu unha nova compañía de telefonía baixo a marca Española de Telefonía, promovida polo cantante Bertín Osborne baixo o lema «as cousas ben feitas, as cousas a dereitas» e destacando que dende a compañía se senten «orgullosamente españois».
Supostamente Española de Telefonía está composta por «cinco profesionais españois de diferentes sectores e con inquedanzas varias, pero con dous denominadores en común: amor polo seu país e paixón por facer as cousas ben», dando a entender que Bertín Orborne é un dos fundadores, e incluso apuntan que tamén operan no mercado da enerxía (aínda que a ligazón ao servizo correspondente non funciona no momento de escribir estas liñas).
Se comprobamos os servizos de telecomunicacións que ofrece Española de Telefonía podemos atopar tarifas móbiles de entre 7,50 e 24,99 euros/mes con chamadas ilimitadas, conectividade 5G e cobertura a través da rede de Movistar, destacando o feito de que o servizo de atención ao cliente traballa dende España «sen call centers estranxeiros», aínda cando se intenta contactar por teléfono coa compañía o servizo é atendido por un sistema automatizado mediante intelixencia artificial.
A compañía tamén ofrece banda larga fixa por fibra óptica a prezos de entre 29,95 e 49,95 euros/mes en función da velocidade contratada, sendo tamén posible combinar os servizos de fibra e móbil con tarifas converxentes de entre 39,95 e 59,95 euros/mes.
En conxunto falamos de prezos que podemos considerar totalmente fóra de mercado, pois son máis caros que os que ofrece a propia Movistar (nalgúns casos directamente, e noutros, a través de O₂).
Pero o máis rechamante do lanzamento deste novo operador é que a súa páxina web carece de elementos básicos para calquera compañía legal en España, e a empresa, EDT Compañía Ibérica de Telefonía, S.L., non figura no rexistro de operadores de comunicacións electrónicas da CNMC, polo que estaría a operar de xeito irregular, sen ofrecer garantías aos seus potenciais clientes.
Esta situación levou a FACUA a denunciar que a nova operadora estaría a «vulnerar ata cinco leis», ao realizar publicidade enganosa, achegar un número telefónico que non é de balde, carecer de información sobre as condicións contractuais, o dereito de desistimento, a protección de datos ou incluso non amosar o domicilio da empresa no aviso legal.
Dende FACUA apuntan a que a compañía podería estar a cometer irregularidades aínda máis graves, das que informarán nos vindeiros días, deixando claro que non debemos confiar nunha proposta comercial con tan poucas garantías para o consumidor.