Denuncian que boa parte dos vídeos promocionais de Polymarket son fraudulentos

Imaxe coa que The Wall Street Journal ilustra a fraude de Polymarket

Unha investigación do Wall Street Journal sinala que Polymarket estaría a impulsar campañas promocionais en redes sociais baseadas en contidos potencialmente enganosos, nos que creadores de vídeo simulan obter grandes beneficios mediante apostas na plataforma sen que estas operacións sexan reais.
Segundo a análise realizada polo diario estadounidense, revisáronse preto de 1.100 vídeos sobre Polymarket e tamén materiais instrutivos facilitados a creadores de contido. Neses materiais descríbense prácticas para reproducir interfaces que imitan o funcionamento da plataforma, nalgúns casos con sitios web case idénticos ao orixinal, nos que se representan apostas e ganancias ficticias.
As conclusións da investigación indican que unha parte significativa destes vídeos non mostraba operacións reais. En numerosos casos, os creadores reaccionaban a supostas ganancias que, de terse producido en mercados reais, non corresponderían con resultados verídicos. O xornal tamén apunta que unha rede de difusión coordinada por un contratista de márketing contribuía a amplificar este tipo de contidos en redes sociais.
En 118 dos vídeos analizados os supostos beneficios acadaban cantidades próximas aos 900.000 dólares, mentres que en realidade esas mesmas apostas terían suposto perdas. Moitos dos vídeos incluían sinais de falsificación, como dominios que imitaban a web oficial sen ser a súa dirección real, e que unha parte relevante do material foi posteriormente eliminada das redes sociais tras o inicio das consultas xornalísticas.
Temos así que Polymarket non só estaría a encubrir un sistema de apostas disfrazándoo de plataforma de predición, senón que se estaría a promocionar de xeito fraudulento. Esta situación fai que a apertura dun expediente por parte da Dirección Xeral de Ordenación do Xogo e o bloqueo desta páxina web dende o territorio español pareza máis que xustificada. De feito, en Estados Unidos tamén hai territorios nos que están a emprender accesións contra este tipo de plataformas.