Desvelan os xogos que chegarán a PS Plus este mes

A partir do 7 de outubro, os subscritores de PlayStation Plus poderán gozar de tres títulos moi distintos entre si: Alan Wake 2, Goat Simulator 3 e Cocoon. Estarán dispoñibles ata o 3 de novembro. Ademais, tamén desde o día 7, os membros de PlayStation Plus Premium terán acceso a unha proba de xogo Midnight Murder Club. Durante unha hora poderán experimentar esta aventura e, no caso de adquirir o título completo, conservarán tanto o progreso como os trofeos.
Alan Wake 2 (PS5) mergulla os xogadores nun relato de terror psicolóxico e supervivencia. O que comeza cunha investigación policial nunha pequena vila convértese axiña nun pesadelo que se desenvolve en dous mundos e con dúas perspectivas: a do propio Alan Wake, atrapado no Lugar escuro, e a da nova heroína, Saga Anderson, que tenta resolver o misterio dende o noroeste do Pacífico. A luz convértese na mellor arma contra os inimigos sobrenaturais, nunha loita onde a xestión dos recursos será clave.
En Goat Simulator 3 (PS4, PS5), Pilgor regresa nunha experiencia sandbox chea de caos e humor absurdo. Poderedes xogar en solitario ou convidar ata tres amigos, tanto en liña coma en modo local, para crear destrución conxunta ou enfrontarvos en minixogos. O mundo aberto ofrece novas oportunidades para explorar, golpear, lamber e facer todo tipo de tolemias.
Por último, Cocoon (PS4, PS5), creación de Jeppe Carlsen (deseñador principal de Limbo e Inside), propón unha aventura de enigmas onde cada mundo está contido nunha esfera que se pode transportar, combinar e reorganizar. As súas mecánicas permiten alternar entre biomas alieníxenas e dispositivos biomecánicos, empregando as habilidades únicas de cada orbe para resolver complexos quebracabezas e abrir camiños ocultos.