Detallan os xogos que chegarán a Game Pass nas vindeiras semanas

mércores, 3 de xaneiro do 2024 Marcus Fernández

O catálogo de xogos dispoñibles para os subscritores de Xbox Game Pass vai mudar en xaneiro coa despedida de Grand Theft Auto V (xunto con Garden Story, MotoGP 22, Persona 4 Golden e Persona 3 Portable) e a incorporación de 8 novos títulos, entre os que hai algúns xogos tan relevantes como Assassin’s Creed Valhalla, Resident Evil 2 e We Happy Few.
Aparte dos mencionados títulos, hoxe mesmo chega ao catálogo Close to the Sun, mañá chega Hell Let Loose, o día 9 teremos Figment, o día 11 é a quenda de Super Mega Baseball 4 e o 16 de xaneiro rematará a quenda de novas incorporacións con Those Who Remain.
Pero a meirande parte dos subscritores estarán máis pendentes de Assassin’s Creed Valhalla, a penúltima grande entrega da saga de Ubisoft, que chegará o vindeiro día 9; a magnífica revisión de Resident Evil 2 estará dispoñible a partir do día 16; e incluso haberá moitos que agradecerán o regreso ao Game Pass de We Happy Few, xogo de aventuras ambientado nos anos 60 nunha Inglaterra distópica na que a poboación está sometida ao consumo dunha droga que provoca unha falsa felicidade.

PUBLICIDADE