Dezasete proxectos de innovación empresarial voan alto grazas ás axudas INCUVI da UVigo
venres, 21 de xaneiro do 2022
A
Universidade de Vigo celebrou este xoves 20 de xaneiro o acto de
entrega da X
edición das Axudas INCUVI-Emprende, VI de INCUVI-Avanza e II de
INCUVI-Consolida, tres convocatorias coas que a institución
académica viguesa quere contribuír a converter en realidades
empresariais concretas os proxectos innovadores do seu alumnado. No
acto, que se celebrou novamente de xeito virtual, puxéronse en valor
e destacáronse 17 iniciativas emprendedoras.
Este
recoñecemento ao espírito emprendedor dos estudantes materializouse
en doce axudas INCUVI Emprende, para aquelas ideas que se atopan no
seu nivel de desenvolvemento máis básico; catro axudas INCUVI
Avanza, para os proxectos que xa teñen certo nivel de maduración e
unha axuda INCUVI Consolida para que un proxecto xa constituído,
que pasou polos programas Emprende e Avanza, poida seguir recibindo
asesoramento específico e unha axuda económica que lle facilite a
súa consolidación empresarial.
Con
respecto aos proxectos galardoados na décimo edición de INCUVI
Emprende, a directora da Área de Emprego e Emprendemento Maruxa
Álvarez destacou o seu elevado grao de madurez. “Hai moita materia
prima de moi alta calidade”, recalcou Álvarez. Algunhas das
propostas gañadoras teñen xa certo grao de maduración e contan
incluso con proposta de nome comercial, mentres que outras están
aínda pendentes de ir perfilando todos os detalles que compoñen
unha idea de negocio xa máis consolidada. Lilla: renting de moda
propón a adaptación do concepto do renting ou aluguer á
moda co obxectivo de darlle acceso ao público en xeral a produtos
exclusivos que, doutro xeito, non se podería permitir. Tamén en
relación co sector téxtil outra das iniciativas gañadoras propón
a creación dunha marca de roupa inclusiva de xénero no-binario, na
que non se teña en conta nin a morfoloxía masculina nin a feminina.
Desde
o Grao da Enxeñaría Biomédica un grupo de catro alumnos propoñen
un sistema que facilitaría a detección precoz de infeccións en
dispositivos implantábeis visíbeis por viraxe de cor e, dos seus
veciños do Grao en Enxeñaría da Enerxía, apostan por un proxecto
de eólica mariña sobre batea. Moitas propostas chegan tamén do
ámbito científico. InsectNova
diríxese a obtención de fariñas ricas en proteínas a partir de
insectos. No caso de Rocío Paladea, do Mestrado en Biotecnoloxía
Avanzada, propón un sistema de crio-preservación de gametos de
especies animais de interese comercial e/ou en perigo de extinción.
O
centro de día Ruliña é outra das iniciativas gañadoras e,
en relación co sector hoteleiro e turístico, están Rooms
Renovación Hotelera Eficiente e Work Like a Local, “unha
consultoría turística cuxa misión será adaptarse ás necesidades
do novo viaxeiro de negocios posCOVID”. Completan o cadro de ideas
gañadoras a academia de alto rendemento TecnifícaT; Uvigo
Merch, un proxecto de tenda de merchandising para a
Universidade de Vigo, e Innovocis, un proxecto que une a
comunicación dixital coa innovación.
Os
catro proxectos seleccionados para participar nesta edición en
INCUVI Avanza formaron parte o curso pasado de INCUVII Emprende. No
caso de Diana Limón, proxecto de comunicación dixital e
copywriter especializado no sector artesán, está promovido
por Diana Torres, do Grao en Publicidade e Relacións Públicas, e o
seu obxectivo é “facilitar aos artesáns a súa transición cara
o mundo dixital, axudándolles a transmitir a súa esencia ás súas
propias páxinas web”.
Relacionado
tamén cos produtos artesáns, neste caso alimentarios, está
daOrixe, unha plataforma de venda de produtos de proximidade e
responsábeis coa contorna, impulsada por Viviana Martínez, titulada
do Mestrado de Responsabilidade Social Corporativa. “Eu o que fago
é identificar a pequenos produtores galegos que buscan producir os
seus produtos de forma sustentábel e axudar aos consumidores a
descubrir e comprar este tipo de produtos”, tal e como explicou no
vídeo de presentación a súa impulsora.
Completan
os proxectos de INCUVI Avanza Navia3D, unha iniciativa
cultural que xurdiu da unión entre a arqueóloga Rita Pérez e o
enxeñeiro Simón Fernández e que persegue salvar distancias entre
patrimonio histórico, cultura e tecnoloxía (fotogrametría, deseño
e impresión 3D, prototipos virtuais e físicos, cursos formativos e
divulgativos) e Vi&Go, impulsada por Marta Álvarez,
Ignacio Iglesias e Adrián Marnotes, proxecto que ofrece aos seus
posíbeis clientes unha subscrición a unha rede de carga e
intercambio de baterías de motocicletas eléctricas, tanto de uso
particular como profesional.
Para
rematar, ODS Protein, a idea gañadora da segunda
edición de INCUVI Consolida, producen proteínas alternativas a
través de diferentes procesos de fermentación, aptas para ser
incorporadas en múltiples produtos da industria alimentaria.