Dispatch e Sonic Mania Plus chegan a Luna en xullo

Amazon actualizou o catálogo do seu servizo de xogos na nube Luna para o mes de xullo cunha selección de novas incorporacións encabezada por Dispatch, unha comedia de superheroes ambientada nunha oficina, e Sonic Mania Plus, a versión ampliada da aclamada homenaxe aos xogos clásicos do ourizo azul de Sega. A oferta complétase con novos títulos exclusivos para GameNight e unha nova remesa de xogos para PC que os membros de Prime poden reclamar sen custo adicional.
Entre as novidades exclusivas de GameNight xa dispoñibles figura Courtroom Chaos: Starring Arnold Schwarzenegger, unha proposta na que os xogadores deben improvisar declaracións e defender casos absurdos ante un xuíz virtual inspirado en Arnold Schwarzenegger. Tamén se incorpora Centipede Swarm, unha reinterpretación cooperativa do clásico arcade de Atari que transforma o xogo orixinal nun shooter de dobre panca para entre un e catro participantes.
O 22 de xullo sumarase ao catálogo Jackbox Party Pack 8, que reúne cinco novos minixogos para ata dez participantes empregando teléfonos móbiles como controladores, mentres que o día 23 chegará un novo nivel para Angry Birds Mystery Island, ampliando os contidos de Angry Birds Flock Party.
O catálogo Luna Standard recibe este mes Dispatch, un título no que as decisións do xogador condicionan a evolución da historia ao asumir a xestión dun grupo de superheroes tan peculiares como problemáticos. Tamén se incorpora Sonic Mania Plus, que engade aos contidos do xogo orixinal novos personaxes xogables (Mighty e Ray), o modo Encore e outras melloras.
A selección de Luna Standard complétase con LEGO Indiana Jones: The Original Adventures, YouTuber’s Life e Arcade Paradise.
Os membros de Prime tamén poden reclamar durante xullo un total de doce xogos para PC, distribuídos entre GOG, Epic Games Store, Amazon Games App e Legacy Games: CyClones, LoneStar e Symphony of War: The Nephilim Saga (2 de xullo); Still There e Regular Factory: Escape Room (9 de xullo); Poly Vita, Framed Collection e Escape Academy (16 de xullo); In Sound Mind e Mystic Academy: Escape Room (23 de xullo); e Zoria: Age of Shattering e Weakless (30 de xullo).