Documentos xudiciais desvelan información confidencial de PlayStation

Actualmente están a realizarse as audiencias do xuízo no que Microsoft está a enfrontarse á FTC por oporse á compra de Activision Blizzard por parte da compañía de Redmond, e destas sesións está a transcender moita información valiosa, que na súa meirande parte reforzan as afirmacións de Microsoft e dan a entender que a FTC non ten un coñecemento fiel do mercado (ou cando menos dá demasiada credibilidade a certas acusacións de Sony que non deixan de ser especulacións sen fundamento).
Aínda que ata o momento sabíase de documentos que indicaban acordos entre compañías, estratexias comercias ou incluso intencións de compra doutros estudios de videoxogos, a última información revelada é especialmente curiosa, xa que trátase dun documento achegado polo director de PlayStation, Jim Ryan, na que había detalles confidenciais que deberían estar ocultos mediante un marcado negro, pero que ao dixitalizarse as páxinas esta tinta negra transparentou lixeiramente, converténdose en toda unha filtración que achega datos moi interesantes.
Por exemplo, o documento desvelaría que o xogo Horizon Forbidden West tería custado 212 millóns de dólares e involucraría a 300 traballadores durante 5 anos, mentres que The Last of Us Parte II custaría 220 millóns de dólares e involucraría un 200 traballadores.
Tamén é moi interesante a información relativa a Call of Duty, franquía que Sony non quere que caia en mans de Microsoft, e parece estar claro por que: o xogo tería xerado 800 millóns de dólares para PlayStation nos EE.UU. en 2021, chegando a 1.500 millóns de dólares a nivel mundial. Pero esa cantidade sería a relativa unicamente ao xogo, pois ao engadir accesorios, subscricións e outras fontes de ingresos, o volume de negocio que suporía Call of Duty para PlayStation podería supor 13.900 millóns de dólares (ou 15.900 millóns, pois a segunda cifra non se pode distinguir claramente).
Outro dato que recoñece Sony é que preto da metade dos propietario dunha PS5 tamén teñen unha Nintendo Switch, mentres que o volume de posuidores dunha Xbox Series X|S non chegaría ao 20%, deixando clara a posición de domingo que PlayStation ten no mercado (e que precisamente é un dos argumentos de Microsoft para autorizar a compra de Activision Blizzard).