Docuten estrea nova feitura con proxección internacional
mércores, 10 de abril do 2019
Docuten,
a marca da firma galega Enxendra
Technologies, centrada en servizos de sinatura dixital,
facturación electrónica e cobros (todo nunha única plataforma),
estreou este 10 de abril nova imaxe con proxección internacional.
Enxendra Technologies decidiu renovar a feitura do seu produto
estrela, Docuten, un ano despois do seu lanzamento.
Este
novo impulso a Docuten súmase
ao recibido a finais de 2018, coa compra de Besepa (en palabras
de Enxendra, “un impulso empresarial que implicou a completa
dixitalización e automatización de todo o ciclo de documentos de
negocio”).
Para
o deseño da nova imaxe que hoxe se fai pública este 10 de abril,
Enxendra apostou por Desenlace, un estudo de branding
madrileño co que a empresa galega sentiu gran afinidade desde o
primeiro momento.
A
renovación de feitura visual oriéntase a un obxectivo claro e
primordial no 2019: a internacionalización definitiva da marca.
Segundo nos conta acerca destes plans de espallamento Brais Méndez,
director executivo de Enxendra, “sería un orgullo situar a unha
empresa galega como referente do sector a nivel europeo, e
traballaremos sen descanso para conseguilo”. Este proceso, sinala,
comezará co sólido establecemento en Alemaña e Inglaterra, para
seguir expandíndose de maneira gradual polo continente.
Que
é Docuten?
Docuten, en palabras dos seus impulsores, é
a primeira plataforma que agrupa o servizo de facturación
electrónica, sinatura dixital e xestión en liña de toda a
documentación dunha entidade. Ademais, na parte que inclúe a
facturación electrónica, Docuten intégrase cos puntos xerais de
entrada de facturas nas administracións públicas españolas máis
importantes, permitindo o envío no formato Facturae. Por outra
banda, o servizo de sinatura dixital permite asinar contratos e
outros documentos con pleno valor legal a través da web e do móbil.