Dous mozos galegos achegan unha aplicación en Facebook para compartirmos coche
luns, 5 de novembro do 2012
Para as lectoras e lectores de Código
Cero que estean a proxectar nas súas vidas meterse no coche de
alguén para aforrar custes de desprazamento, ou ben meter no
automóbil propio a quen comparta destino, dicirlles que vén de saír
do forno unha aplicación á súa medida: Wydme. Trátase dunha
ferramenta desenvolvida por dous mozos galegos, lanzada para que se
lle tire proveito en Facebook e co obxectivo de apoiarse nesta rede
para asegurar que o condutor ou acompañante requirido é de
confianza. De feito, segundo apuntan os seus creadores, grazas á
dita rede social buscaremos coche nin máis nin menos que entre os
nosos amigos. Ao pouco de pórse en marcha, a aplicación xa conta
con 400 seareiros.
Wydme, que resume no seu nome a
pregunta Would you drive me? (algo como Conduciríasme?),
pon en xogo, amais das súas evidentes vantaxes nun país coma o noso
(un país onde a disposición poboacional, tan dispersa, obriga a
desprazamentos constantes), un funcionamento “intuitivo e moi
claro”, segundo apuntan os seus creadores, Andrés Cámera e
Carlos Martínez.
Isto déixanos marxe para que, sendo usuarios de
Facebook, creemos ou atendamos unha petición de viaxe para un día
sinalado, ou ben procuremos directamente se hai algunha viaxe xa
creada que lle acaia ben ás nosas necesidades. E sempre co engadido
de empregarmos os circuítos de confianza: neste caso concreto o dos
amigos de Facebook. “Por cada un deles”, informan Andrés
e Carlos, “hai unha listaxe coas peticións de desprazamento ou
desprazamentos xa creados nas que se pode buscar por orixe, por
destino ou por data”. A aplicación, como era de agardar, vai
medrando cada día que pasa, proceso que se vai acelerar coa
posibilidade de incluír peticións-viaxes de amigos de amigos,
engadir comentarios ou enviar convites personalizados. Wydme foi creada,
como dixemos, por Andrés Cámera (enxeñeiro informático pola
Universidade de Santiago que traballa arestora en Madrid) e o deseño
corre a cargo de Carlos Martínez, arquitecto formado na Universidade
Europea de Madrid.