Altman advirte do uso da IA para cometer fraudes

Durante unha intervención na Reserva Federal dos Estados Unidos, o director xeral de OpenAI, Sam Altman, advertiu de que o mundo podería estar preto dunha «crise de fraude» provocada polo uso malintencionado da intelixencia artificial para suplantar identidades, xa que o avance da IA está a deixar obsoletos moitos métodos de autenticación, como o recoñecemento de voz, que aínda empregan algunhas entidades financeiras.
«É unha tolemia seguir permitindo transferencias de diñeiro importantes baseándose só nunha frase de voz. A IA xa superou a maioría dos métodos actuais de autenticación, agás os contrasinais», advertiu Altman, quen tamén apuntou que OpenAI non desenvolve ferramentas para suplantación, porén advertiu de que o mundo terá que enfrontar en breve o reto de discernir entre contidos reais e falsos en voz e vídeo. «Hoxe é unha chamada de voz; mañá será unha videollamada indistinguible da realidade», apuntou.
Altman tamén expresou preocupación ante o risco de que actores maliciosos desenvolvan unha superintelixencia antes de que o mundo estea preparado para defendérense, mencionando posibles ataques a infraestruturas críticas ou o desenvolvemento de armas biolóxicas como escenarios posibles.
En canto ao impacto da IA no emprego, Altman distanciouse de outras voces do sector que alertan dunha destrución masiva de postos de traballo. «Ninguén sabe o que vai pasar. Hai moitas predicións intelixentes, pero a realidade é que este sistema é demasiado complexo para facer prognósticos certeiros», asegurou. Aínda así, vaticinou que desaparecerán profesións enteiras e aparecerán outras novas, e apuntou que dentro de 100 anos o concepto de traballo podería perder sentido: «Terás todo o que precises e nada que facer, así que inventarás un traballo para sentirte útil».

ChatGPT mellora a produtividade

Coincidindo coa súa intervención, OpenAI publicou un informe onde se defende que ChatGPT está a mellorar a produtividade dos traballadores. O documento compara o impacto da IA con outras tecnoloxías transformadoras como a electricidade ou o transistor, e estima que ChatGPT conta xa con 500 millóns de usuarios en todo o mundo.
Segundo o informe, o 20 % dos usuarios nos EE.UU. empregan ChatGPT como titor personalizado para aprender ou mellorar habilidades profesionais. Máis da metade teñen entre 18 e 34 anos, o que podería traducirse en beneficios económicos a longo prazo.