EBF presentou o seu mestrado de videoxogos na Coruña

luns, 28 de maio do 2018 Marcus Fernández

O pasado sábado aproveitouse a celebración de ExpOtaku no recinto de EXPOCoruña, edificio no que tamén está a sede da European Business Factory (EBF), para presentar oficialmente o Mestrado en Creación de Videoxogos que botará a andar a finais de ano e que durante 500 horas buscará formar aos participantes no proceso de creación de videoxogos dende un enfoque humanístico, ou sexa, que incidirán máis nos labores creativos que na aprendizaxe de ferramentas técnicas.
Para afondar neste mestrado, o seu coordinador, Adrián Suárez Mouriño, autor do libro Sobre Mario que o vindeiro xoves presentarase na libraría Arenas da Coruña, fixo un repaso da súa estrutura e insistiu no feito de que buscan formar un equipo que principalmente teña paixón polos videoxogos e que poida destinar grandes esforzos ao mestrado profesional que non só estará composto por 500 horas de formación, senón que tamén precisará de traballo por parte dos alumnos para conseguir superar os obxectivos establecidos para así poder desenvolver un digno traballo de fin de mestrado.
Suárez convidou aos asistentes a manifestar o seu interese por esta iniciativa formativa, destacando que conta con interesantes bolsas para que os cartos non sexan un grande atranco para conseguir a formación precisa para poder dar o salto profesional ao que xa é o principal sector cultural en volume de negocio.
Este mestrado desenvolverase en xornadas de venres (de 16:00 a 21:00 horas) e sábado (de 9:00 a 14:00 horas), e pese a estar aínda iniciando a súa promoción, xa conta cun bo volume de persoas interesadas en participar no mesmo, dado o atractivo que ten o sector dos videoxogos de cara a unha proxección profesional.

O coordinador do mestrado asegurou que estaba aberto a un amplo perfil de alumnos, dos que buscarían precisamente certa paixón polo medio, xa que sen vocación resultaría difícil enfrontar o duro traballo que haberá que superar.

PUBLICIDADE