EMi xa permitiu realizar o perfilado competencial de máis de 74.700 persoas

A Consellería de Emprego fixo un novo balance da actividade xerada polo software con Intelixencia Artificial EMi, habilitado nas 54 oficinas de emprego galegas en abril de 2024. Segundo informou a Xunta, esta ferramenta xa permitiu realizar o perfilado competencial de máis de 74.700 persoas demandantes de emprego, “superando o obxectivo de 70.000 perfís marcado para este mes de setembro e favorecendo a potenciación da empregabilidade destes usuarios”, explicou a Consellería.
Esta iniciativa enmárcase na modernización integral do Servizo Público de Emprego de Galicia (SPEG) que está a impulsar a Xunta en prol “da xestión eficaz do talento na comunidade”, segundo sinalou o conselleiro de Emprego, José González, no marco do Foro Empregabilidade: empresa e talento, o binomio imprescindible, celebrado na sede do Círculo de Empresarios de Galicia, onde estivo acompañado polo secretario xeral de Emprego e Relacións Laborais, Pablo Fernández, e no que tamén participou a presidenta do Círculo de Empresarios de Galicia, María Borrás.
Lembrar que EMi utiliza Intelixencia Artificial para conectar oferta e demanda no mercado laboral. Esta ferramenta facilita o axuste en tempo real entre as necesidades de persoal do tecido produtivo e os perfís das persoas demandantes rexistradas no servizo público de emprego, contribuíndo así a facer fronte ao reto de cubrir vacantes. Entre os seus beneficios, EMi analiza as características e competencias das persoas demandantes en relación con datos avanzados do mercado laboral, identificando tanto sectores emerxentes como empresas que están a contratar en cada ocupación.