Echoboom lanza un simulador aéreo das dúas Guerras Mundiais con importantes vertentes didácticas
mércores, 29 de maio do 2013
Partindo da base das
capacidades de comunicación da tecnoloxía de lecer entre as novas
xeracións e as que xa non son tan novas (linguaxe común), a empresa
española Echoboom Apps vén
de desenvolver un videoxogo dirixido a abranguer o público máis
amplo posíbel, “dende os trece anos até a idade adulta”.
O videoxogo en cuestión chámase Dogfight e consiste nun simulador aéreo multixogador da Primeira Guerra
Mundial, que ademais facilita unha especial capacidade de
integración no que a diferentes idades se refire. Ou sexa, “que
permite a familiares e amigos xogar deseñando estratexias en
conxunto, deste xeito, a experiencia vólvese máis interactiva cunha
dinámica social”, sinala
Echoboom, empresa especializada na achega de xogos con contidos
educativos.
Esta miúdo estudio nado
en Madrid aplica a arela formativa e didáctica a tódolos proxectos
de seu, e Dogfight Elite, con toda probabilidade primeiro
simulador aéreo con contidos educativos históricos da Primeira e
Segunda Guerra Mundial, non é unha excepción. “Con Dogfight
Elite”, sinalan, “pretendemos revelar historias
descoñecidas que sexan atractivas para o xogador, anécdotas sobre o
lado máis humano dos pilotos; un exemplo diso sería
respectar no xogo o código de honra que existía entre os cabaleiros
do aire, unha moral subxacente aínda que se tratase dunha guerra”.
Esta é unha das importantes leccións que achega o xogo, engaden
dende Echoboom.
Joaquín Grech, o seu
fundador, explica outro labor salientábel, que é o labor previo de
investigación para poder desenvolver un simulador destas
características e documentalo. “Non soamente é fundamental que
os datos históricos sexan totalmente precisos, senón que o xogo
estea baseado na física, polo que tampouco exista
unha marxe de erro no lado técnico do xogo”, comenta. Deste
xeito, con Dogfight Elite, nenos e adultos aprenden nocións
de mecánica, de técnicas de voo, así como características da
potencia do motor.
Echoboom é unha empresa
especializada no desenvolvemento de apps para móbiles
(Android, iOS, BlackBerry, Windows Mobile). Deseña e desenvolve
aplicacións móbiles adaptadas ás necesidades do mercado ademais
das súas propias. A iniciativa nace en marzo de 2012 da man dun mozo
emprendedor, Joaquin Grech, programador de profesión pola
Universidade de Nova York.