Elon Musk podería bloquear X/Twitter en Europa para non ter que cumprir a lei

xoves, 19 de outubro do 2023 Marcus Fernández

Ante a proliferación de contidos violentos e enganosos en X por mor do conflito armado en Israel e Gaza, o comisario Thierry Breton escribiu unha carta a Elon Musk pedíndolle que cumprise coa lexislación europea, ao que seguiu unha solicitude formal da Comisión Europea a X, que a directora xeral da compañía, Linda Yaccarino, respondeu de xeito educado pero moi pouco satisfactorio, dando a impresión de que é inevitable a apertura dunha investigación oficial que remate en sancións económicas que poderían chegar até o 6% dos ingresos globais da compañía en virtude da Lei de Servizos Dixitais que teñen que cumprir as grandes compañías da Internet.
Dende Business Insider aseguran que nas últimas semanas Elon Musk suxeriu que podería facer que X/Twitter deixase de ser accesible dende Europa para evitar así ter que someterse á Lei de Servizos Dixitais, o que claramente resultaríalle máis doado que mellorar a seguridade da plataforma, que dende que Musk é o dono de Twitter vai de mal en peor (xa que Musk despediu á meirande parte do persoal de Twitter encargado da moderación e o cumprimento de obrigas legais).
Cómpre lembrar que Threads (de Meta) aínda non está dispoñible en Europa por mor da lexislación de protección de datos, e numerosos medios de comunicación estadounidenses fan o mesmo (bloquean o acceso aos usuarios europeos xa que non lles compensa establecer as medidas necesarias para cumprir a lexislación europea).

PUBLICIDADE