En agosto (e en setembro) proseguen os obradoiros Girl STEAM de AMTEGA e o CPETIG

luns, 14 de agosto do 2023 S. P.

Este mes de agosto prosegue a actividade conxunta da AMTEGA e o CPETIG dirixida a esperar vocacións tecno-científicas entre as nenas e co obxectivo de reducir fendas de xénero nos estudos e no ámbito profesional STEM (Ciencia, Tecnoloxía, Enxeñaría e Matemática). Estamos a falar do ciclo de obradoiros Girl STEAM, desenvolvido pola axencia autonómica en colaboración co Colexio Profesional de Enxeñería Técnica en Informática de Galicia (CPETIG). Estas actividades, que tamén teñen o obxectivo de dar visibilidade ao rol da muller no eido tecnolóxico, comezaron en xullo e proseguen até setembro. Neste ecuador de agosto, haberá obradoiros en Guitiriz e Valga.
Son obradoiros de carácter práctico e presencial nas aulas CeMIT de 16 concellos de toda Galicia. Cada concello conta con dúas quendas por idade, unha para escolares de 8-11 anos e outra para idades comprendidas entre os 12-15 anos, cun aforo máximo de 15 persoas por quenda.
Contidos dos obradoiros
Nestas sesións de experimentación tecnolóxica o alumnado de menor idade elabora unha peza audiovisual en formato stop motion a partir dun circuíto de luces LED da súa autoría. Por outra banda, as persoas participantes de 12 a 15 anos experimentarán coa creación de tecidos intelixentes, mediante a programación de sensores cunha placa libre Arduino para construír un proxecto sobre unha prenda téxtil que reaccione a cambios de distancia, luz, inclinación etc.
Apoderar ás rapazas nos eidos STEAM
Trátase de impulsar actividades de mentorado desde idades temperás dirixidas ás rapazas, para espertar o seu interese e reforzar a confianza nas súas capacidades para cursar estudos STEAM (siglas en inglés de Ciencia, Tecnoloxía, Enxeñería, Artes e Matemáticas) e apostar por profesións do ámbito TIC (Tecnoloxías da Información e a Comunicación).
No desenvolvemento dos obradoiros búscase trasladar mensaxes e elementos transversais como a igualdade, o sentido crítico ante a tecnoloxía e o uso creativo da mesma, a colaboración, o traballo en equipo e a importancia das artes como ferramenta de desenvolvemento.
Estas son as actividades pendentes:
18 de agosto: Guitiriz - Obradoiro Girl STEAM para escolares de 12 a 15 anos
17 de agosto: Valga - Obradoiro Girl STEAM para escolares de 8 a 11 anos
25 de agosto: Valga - Obradoiro Girl STEAM para escolares de 12 a 15 anos
21 de agosto: Barreiros - Obradoiro Girl STEAM para escolares de 8 a 11 anos
22 de agosto: Barreiros - Obradoiro Girl STEAM para escolares de 12 a 15 anos
23 de agosto: Ribadeo - Obradoiros Girl STEAM para escolares de 8 a 11 anos
24 de agosto: Ribadeo - Obradoiros Girl STEAM para escolares de 12 a 15 anos
28 de agosto: Vigo - Obradoiro Girl STEAM para escolares de 8 a 11 anos
29 de agosto: Vigo - Obradoiro Girl STEAM para escolares de 12 a 15 anos
7 de setembro: GaiásTech - Obradoiro Girl STEAM para escolares de 8 a 11 anos
8 de setembro: GaiásTech - Obradoiro Girl STEAM para escolares de 12 a 15 anos

PUBLICIDADE