En liña a web de Open-VERSO, o proxecto co-impulsado por Gradiant para acelerar a revolución 5G
xoves, 26 de novembro do 2020
O
Centro Tecnolóxico Gradiant informou da posta en marcha da
web de Open-VERSO, un proxecto a tres bandas (impulsado por
Vicontech, i2CAT e Gradiant) para facer avanzar a evolución das
redes móbiles de tecnoloxía 5G. O portal será un punto de encontro
virtual onde se exporán as bases da Rede de Excelencia Cervera
(Open-VERSO) e poranse a disposición das empresas os resultados
obtidos no proxecto.
“Constituirase
como unha ferramenta moi orientada ao mercado”, confirma Gradiant,
que engade a súa vontade de “situala ao servizo das empresas que
están chamadas a acelerar o proceso de dixitalización en diversos
sectores con aplicabilidade de tecnoloxías 5G e futuras”.
Un
concepto innovador ao servizo das empresas e da sociedade
Segundo
explica Gradiant, Open-VERSO deseñará e desenvolverá unha
arquitectura con capacidade de adaptarse a todo tipo de contornas
mediante a evolución dun conxunto de tecnoloxías transversais base
que permitirán a aplicación de conceptos avanzados non dispoñíbeis
comercialmente. Por exemplo, a serie de tecnoloxías que se
habilitarán no proxecto estará relacionada coa Intelixencia
Artificial, a xestión avanzada de redes 5G e a propia evolución de
tecnoloxías dos estándares nas que se basean.
“Nunha
rede orientada ao servizo como é 5G resulta fundamental proporcionar
recursos diferenciados a cada un dos sectores nos que fará impacto a
tecnoloxía”, apunta o centro tecnolóxico vigués, engadindo que
Open-VERSO contempla realizar probas de concepto e desenvolvemento de
prototipos que se validarán mediante aplicacións funcionais e
visualmente atractivas. Por esta razón, “unha parte importante da
metodoloxía que se expón consiste na identificación e avaliación
de indicadores relevantes para diferentes casos de uso que sexan de
abondo representativos para servir de xerme a futuras transferencias
de tecnoloxía da agrupación”.
Entre
outros casos de uso, Open-VERSO fará especial fincapé na
aplicabilidade destas tecnoloxías a sectores como o da radiodifusión
de TV e radio dixital ou 5G-Broadcast, onde a súa integración
nunha rede 5G común permitirán potencialmente a difusión de
contido de TV non só a televisores convencionais senón tamén a
smartphones. Farao dunha maneira “moito máis eficiente
utilizando a mesma infraestrutura de rede”, explica o centro
tecnolóxico galego, que engade que a rede estará “moi envorcada
co mercado, ao servizo das empresas que están chamadas a acelerar a
dixitalización en diversos sectores con aplicabilidade de
tecnoloxías 5G e futuras, formando parte dunha auténtica revolución
económica e social”.