En marcha a Cátedra Denodo–UDC de Enxeñaría de Datos, IA e Innovación Tecnolóxica

A Universidade da Coruña (UDC) e a compañía Denodo veñen de selar unha alianza pola que crean a Cátedra Denodo–UDC de Enxeñería de Datos, IA e Innovación Tecnolóxica. Segundo informaron, este novo instrumento de colaboración entre empresa e academia “está destinado a impulsar a formación, a investigación e a transferencia de coñecemento nos ámbitos máis avanzados da tecnoloxía”.
O acordo, asinado na mañá deste martes 27 de xaneiro polo reitor da UDC, Ricardo Cao e o director executivo (CEO) de Denodo, Ángel Viña, recolle como principais obxectivos da cátedra “a promoción da excelencia formativa dos futuros profesionais da Enxeñaría Informática, especialmente en Enxeñaría de Datos e Intelixencia Artificial; o impulso da investigación aplicada e a innovación tecnolóxica; o fomento da transferencia de coñecemento á sociedade e ás empresas e o intercambio de sinerxías entre o ámbito académico e o empresarial”.
En palabras de Ricardo Cao, reitor da UDC, este acordo supón “unha excelente oportunidade para avanzar en proxectos de transferencia relacionados coa xestión de datos e a IA, especialmente cando falamos dunha colaboración cunha compañía que ten os seus orixes na UDC”. E engadiu: “Hoxe Denodo é unha empresa global, pero o seu nacemento está aquí, na UDC. Desde A Coruña para o mundo. Este camiño demostra que a universidade pública pode ser a mellor incubadora de ideas, empresas e persoas con capacidade de cambio”. Denodo, abundou, “é un exemplo de como o talento local, formado na Universidade da Coruña, pode transformarse nun proxecto empresarial de alcance global. Por iso estamos convencidos de que esta colaboración, no eido formativo, investigador e de transferencia, será moi positiva para ambas partes”.
Como aspecto destacado, a Cátedra establecerá un premio especial en honra a Paula Montoto Castelao, quen foi docente da UDC e unha das primeiras empregadas de Denodo, finada a principios de 2025. Máis polo miúdo, explicaron que o premio ao Mellor Traballo de Fin de Grao (TFG) en Informática con Aplicacións Empresariais creado no marco da Cátedra “nace como unha homenaxe no tempo a Paula Montoto, cuxa traxectoria de 25 anos en Denodo foi fundamental para o éxito da compañía”. Foi ademais unha líder clave en I+D e profesora da UDC durante máis de dúas décadas, experiencia que “lle permitiu ser mentora de máis de 20 promocións de enxeñeiros”.
Ademais do premio conmemorativo, a Cátedra impulsará un amplo programa que pivota en catro eixos: formación, apoio, experiencia e investigación e transferencia.
No eido da formación, colaborarase na participación en mestrados e outros programas de posgrao, así como a organización de seminarios, conferencias, obradoiros e xornadas científicas. Como apoio á investigación e iniciativas innovadoras, patrocinaranse bolsas pre e posdoutorais e premios.
Co obxectivo de facilitar a experiencia laboral, promoveranse prácticas curriculares e extracurriculares en contornas tecnolóxicas e traballarase no impulso de publicacións e actividades de divulgación científica e cultural.
Amais, na parte de investigación e transferencia, desenvolveranse liñas de traballo conxuntas e colaboración para captar proxectos a nivel galego, estatal e europeo. Prestarase apoio á realización de teses de doutoramento e traballos de fin de grao/mestrado.
Ángel Viña, CEO de Denodo, destacou que: "Regresar ás nosas raíces para investir na próxima xeración de talento é un paso natural para Denodo. A través desta Cátedra, queremos asegurar que o estudantado teña acceso ás ferramentas máis avanzadas e ao coñecemento práctico en IA e Enxeñaría de Datos. O noso obxectivo é pechar a fenda entre a excelencia académica e as necesidades cambiantes da industria tecnolóxica global, fomentando unha innovación que comeza aquí mesmo, na Coruña."
Ademais, dixo, “o premio Profesora Montoto serve como tributo ao seu legado, celebrando o seu dobre papel como educadora e pioneira na industria tecnolóxica, e garantindo que o seu compromiso coa innovación siga inspirando ás novas xeracións."
A Cátedra, cunha duración inicial de catro anos, contará cunha dotación anual de 20.000 euros, achegada por Denodo e xestionada a través da Fundación CITIC. Estará dirixida por José Losada, profesor de Ciencias da Computación na Facultade de Informática da UDC, onde imparte docencia nos graos Enxeñaría Informática e no de Ciencia e Enxeñaría de Datos; e investigador do CITIC.