En marcha a segunda aceleradora de comercio da Deputación de Pontevedra
venres, 11 de xuño do 2021
A
Deputación
de Pontevedra, a través da rede de capacitación tecnolóxica
SmartPEME, puxo en marcha a segunda edición da súa Aceleradora de
Comercio, que arrinca con dez empresas da provincia. Formaranse
durante catro meses en competitividade, imaxe dixital, canvas,
comercio en liña, sustentabilidade, redes sociais e finanzas.
Son
un total de dez empresas dos concellos de Pontevedra (3), Lalín (2),
Crecente, Meaño, Silleda, Vigo e Vilagarcía de Arousa. En concreto,
recibirán coñecementos e técnicas para mellorar a planificación e
desenvolvemento dos seus proxectos, lanzar as súas tendas en liña,
crear as súas propias webs ou mellorar o posicionamento. Tamén
serán formadas para poder incrementar as vendas e rentabilidade,
afondar na promoción en redes sociais, na mercadotecnia dixital e no
branding, así como coñecer as técnicas para o estudo de
datos estatísticos, establecer mecanismos para diferenciarse da
competencia, procurar clientes potenciais e coñecer as ferramentas
dispoñíbeis para impulsar a súa dixitalización.
As
firmas seleccionadas de Pontevedra son María de los Ángeles
Vázquez, dedicada á venda de roupa de deseño de muller;
Mimobooks (de Goretti Cabido), venda de libros acolchados,
camisetas e tote bags; e Cibertopia (de Fermín
González), que comercializa servizos tecnolóxicos.
Pola
súa banda de Lalín foron seleccionadas Namaskar (Cristina
Barreiro), venda de produtos e preparados herbais; e Mel e Canela
(Raquel Fernández), comercio de produtos ecolóxicos e locais a
granel.
De
Crecente participa Trees (Mar Penela), deseña lugares para
que estean máis conectados coa natureza; de Meaño Produhostel
(Mónica Silva), dedicada á distribución de produtos para a
hostalaría e a industria; de Silleda Herbolario BIO (José
Alberto López), proxecto de venda de produtos de cosmética bio; de
Vigo AK (Antonina Kadyrova), tenda en liña de produtos de
marroquinería feita a man; e de Vilagarcía de Arousa Arual
Ecology (Laura Carro), marca de roupa sustentábel que emprega
tecidos ecolóxicos ou reciclados.
Todas
as empresas foron valoradas polo seu grao de innovación, o seu
carácter tecnolóxico, o seu alto potencial de crecemento e o feito
de ser proxectos ligados ao comercio en fase temperá de
desenvolvemento.
A
aceleradora de comercio da Deputación de Pontevedra, que arranca
deste xeito a súa segunda edición, ten por obxectivo optimizar a
competitividade e eficiencia das empresas a través de formación e
asesoramentos específicos. Na súa primeira edición Comercial
Limeres (Pontevedra), Blaurtopías (Vigo), Tipi Fiestas Galicia
(Nigrán), Broderie (Ponteareas), Foodies and travellers (Vigo),
Infusiónate (Lalín), SS3 Professional (Mos) e Tamerlán (Vigo).