En setembro chega á Coruña a a exposición internacional AI: More than human

mércores, 3 de agosto do 2022 S. P.

A sede da Coruña de Afundación prepárase estes días para recibir a montaxe da exposición internacional AI: More than human, un proxecto expositivo inmersivo e interactivo sobre Intelixencia Artificial creado polo Barbican Centre de Londres e co-producido polo Forum Groningen de Países Baixos. En palabras de Afundación, “trátase dun proxecto innovador, multidisciplinar e orientado cara ao futuro”.
A exposición, organizada na Coruña en colaboración con Ilux Visual Technologies, inaugurarase a comezos do mes de setembro e conta cunha montaxe que ocupará todo o edificio, dividido en catro apartados diferentes, sendo The Dream of AI a primeira parada no percorrido. Nela demóstrase que os inicios das tecnoloxías con capacidade de procesar grandes cantidades de información, aprender e tomar decisións son moito máis antigos do que adoitamos a crer, xa que se remontan a tradicións relixiosas coma o xintoísmo xaponés ou a cultura xudía.
A segunda sección da exposición leva por nome Mind Machines e amosa como a Intelixencia Artificial cobra forma grazas aos avances informáticos e matemáticos dos século XIX e XX, e como estes seguiron expandíndose a grande velocidade no século XXI dando á tecnoloxía capacidades espectaculares como acontece coas redes neuronais artificiais. Os visitantes terán a oportunidade de ver e interactuar coas máquinas Enigma e Bombe de Alan Turing, elementos claves no transcurso da II Guerra Mundial. Pero tamén con desenvolvementos máis recentes de empresas como Denso Corporation, que expón o seu brazo robótico, e o departamento de Arte e Cultura de Google, que presenta unha obra interactiva que achega a IA á poesía británica do século XIX, entre outras moitas obras.
Data Worlds é a terceira sección de AI: More than human. Nela ofrécese unha análise da infinidade de aplicacións que ten esta tecnoloxía, así como a súa incorporación a ámbitos como a sanidade, o xornalismo ou o comercio.
Endless Evolutio é a última sección do percorrido e céntrase na área de investigación coñecida como A-Life, a cal amosa a fusión da IA con outras disciplinas para cambiar a nosa idea do que chamamos “natural”. Aquí, o visitante poderá ver, por exemplo, como millóns de copias dun álbum musical poden ser codificadas en ADN e gardadas dentro de botes de spray, ou incluso ulir as flores dunha árbore que se extinguiu máis de 100 anos atrás.
Ademais, deseñouse unha aplicación exclusiva para a estadía da exposición na Coruña. Trátase dun desenvolvemento que combina a IA coa análise da información a gran escala (Big Data), todo isto aplicado ao turismo, para facilitar a busca de recursos mediante imaxes.

PUBLICIDADE