Entregados os Premios Rosalía de Castro a Xaquín Marín, a Agrupación Ío e Twitter en galego
venres, 23 de xullo do 2021
Este
22 de xuño celebrouse
en Fene a entrega das distincións dos Premios Rosalía de Castro,
concedidos pola Deputación da Coruña. Foron dar ao debuxante
Xaquín Marín, á Agrupación Astronómica Ío e a plataforma
Twitter en galego, que, como lembraremos, envorca esforzos en
reivindicar a nosa lingua ao abeiro desta popular rede social. A
deputada de Normalización Lingüística, María Muíño, presidiu a
entrega dos galardóns e destacou o “compromiso coa lingua” dos
galardoados.
No
acto, no que tamén estivo presente o alcalde de Fene, Juventino
Trigo, e que contou coa actuación de Xabier Díaz; María Muíño
tamén salientou que esta foi “unha das convocatorias máis
numerosas en canto a candidaturas e calidade e méritos destas” e
lembrou que este premio naceu en 2011 co fin de “recoñecer a
promoción e dignificación do noso patrimonio lingüístico e
fixémolo co nome dunha das grandes da literatura universal”.
O
xurado estivo composto pola técnica de normalización lingüística
do concello da Coruña, Julia Rigueiro, o profesor da Universidade da
Coruña, Carlos Caetano Viscaíno e, en representación dos proxectos
gañadores da edición anterior, Ana Belén Costoya de Nós TV e
Inmaculada Seage polo Club de Debate coa deputada de Normalización
Lingüística, María Muíño, como presidenta e a técnica da
Deputación, Dores Sánchez Alegre como secretaria.
Os
premiados
Os
Premios Rosalía de Castro, edición XII, foron dar este ano ao
debuxante Xaquín Marín (categoría persoas), á Agrupación
Astronómica Ío (entidades) e á iniciativa Twitter en Galego
(modalidade de iniciativas de xente nova), adicada esta última a
reivindicar a presenza activa da nosa lingua na coñecida rede
social.
O
debuxante Xaquín Marín é o gañador na categoría de persoas que
destacan na promoción da lingua galega por, segundo o xurado, "o
compromiso continuado no tempo, polo alcance social do seu traballo e
por facer humor gráfico nun contexto histórico de especial
dificultade en plena ditadura franquista e en medios de comunicación
onde a presenza do galego era residual”.
Na
categoría de entidade que destaca na promoción da lingua galega a
gañadora foi a Agrupación Astronomía Ío, “por impulsar a lingua
galega nun ámbito tan especializado como a astronomía e sen bagaxe
no noso idioma que ademais conseguen trasladar dun xeito accesible e
atractivo para o público xeral”.
Finalmente,
na categoría de proxecto concreto de dinamización lingüística que
realice un traballo específico cos treitos da poboación de menor
idade, nenez e mocidade, e que “atenda espazos emerxentes de uso da
lingua”, a gañadora foi a iniciativa Twitter en Galego, promovida
por Carlos García Vieito da que se sinala que coordina “o proceso
de tradución para configurar esta plataforma social na nosa lingua e
fornece un referente nas redes sociais, para o público xeral e para
a mocidade en particular, facendo que cada día máis chíos sexan en
galego”. Valorouse tamén que Twitter en Galego cree “terminoloxía
que permite colocar a lingua galega na nova realidade dixital” e
destácase o “grande impacto social con máis de 15.000 persoas
usuarias coa conta configurada en galego”.
O
premio está dotado con 2.100 euros por categoría.