Epic Games despide a centos de traballadores e sube o prezo dos paVos de Fortnite

Aínda que vexamos a Epic Games como unha compañía de grande éxito que arrasa con Fortnite e coa súa propia tenda de aplicacións, está a emprender unha reestruturación, e anuncia que vai despedir a preto do 16 dos seus empregados (uns 870 traballadores) e desfacerse de Bandcamp (plataforma musical que adquiriron o ano pasado) e boa parte de SuperAwesome (compañía que se uniu a Epic en 2020).
O máximo responsable da compañía, Tim Sweeney, recoñece que levan tempo gastando moitos máis cartos dos que ingresan, como un investimento na súa evolución e no ecosistema de Fortnite, pero agora considera que pecou de excesivo optimismo, e ten que recortar gastos.
Menciona que os ingresos de Fortnite volven medrar, pero o crecemento actual depende en boa medida do contido dos creadores que levan unha parte destes ingresos, polo que a marxe de beneficio é inferior, o que está a provocar un cambio estrutural na economía da compañía.
A compañía está a realizar esforzos para reducir custos, manteñen unha contratación neta cero e están a reducir o gasto operativo en cousas como márketing e eventos, medidas que non chegan para acadar unha sustentabilidade financeira, de xeito que o axuste do cadro de persoal é a única saída que lles queda para estabilizar as súas finanzas.

Suba de prezos en Fortnite

Este anuncio chega poucas horas despois de que anunciasen un axuste de prezos para Fortnite, ou sexa, que a partir do 27 de outubro subirán o prezo dos paVos (a moeda virtual do xogo). Por exemplo, o lote de 1.000 paVos, que actualmente pode adquirirse por 7,99 euros, pasará a venderse por 8,99 euros. Falamos dunha suba de prezos polos contidos no xogo que estaría no contorno do 12,5%.