Epic ofrece de balde o xogo DOOM 64

A tenda de xogos de Epic Games está a apostar forte polos seus xogos de balde, e para animar á xente a que probe novos lanzamentos free-to-play como son MultiVersus (considerado o Smash Bros. da Warner) e Rumbleverse (o novo battle royale de loita) están a ofrecer de balde até o 25 de agosto todo un clásico: DOOM 64.
DOOM 64 é unha versión do DOOM de 1997 mellorada para Nintendo 64, e que en 2020 chegou a PC e consolas para celebrar o 25º aniversario deste clásico de id Software. Este xogo conta cun deseño visual mellorado, controis de teclado e rato mellorados, compatibilidade con mandos, compatibilidade con resolución de pantallas anchas, compatibilidade con 60 imaxes por segundo nativas, máis de 30 niveis de acción frenética e incluso os niveis perdidos que continúan a historia. Un xogo que igual non é apto para novos xogadores, pero que pode debuxar un sorriso na cara a quen gozase do DOOM orixinal no seu día.