Escollen os microrrelatos gañadores do concurso organizado pola RAG e PuntoGal
martes, 23 de abril do 2019
Jessica Rodríguez
Sánchez, veciña de Visantoña (Mesía) de 35 anos, Óscar Fernández Freire,
coruñés de 17 anos, e Claudia Martínez Asenjo, compostelá de 11 anos, son as
persoas gañadoras dos tres primeiros premios, nas modalidades de adultos,
xuvenil e infantil, do II Concurso de microrrelatos convocado pola Real
Academia Galega e PuntoGal. O xurado, reunido este mediodía na sede da RAG,
escolleunos entre as case 500 propostas recibidas xunto a outros seis
microrrelatos distinguidos cos segundos e os terceiros premios, asinados por
amantes da escrita de todas as idades.
A Real Academia
Galega e PuntoGal convocaron por segundo ano o concurso de microrrelatos,
aberto a textos de ata 200 palabras, co obxectivo reforzar a presenza da lingua
e da identidade propias no mundo dixital. O presidente da Real Academia Galega,
Víctor F. Freixanes; o presidente de PuntoGal e académico Manuel González; a
escritora e académica correspondente Mercedes Queixas Zas; o director xeral de
PuntoGal, Darío Janeiro; e a xornalista e coordinadora de Luzes, Valeria
Pereiras, conformaron o xurado que avaliou os relatos presentados ao certame,
case un cento máis que na primeira edición.
A psicóloga e
logopedista Jessica Rodríguez Sánchez fíxose co primeiro premio na modalidade
de adultos cun relato de 85 palabras titulado A fiestra. O mellor texto na
modalidade xuvenil foi para Cacería
nocturna, de Óscar Fernández Freire, alumno de primeiro de bacharelato do
Colexio Eirís da Coruña; e o primeiro premio de infantil gañouno Claudia
Martínez Asenjo, alumna de sexto de primaria no CEIP Monte dos Postes de
Santiago de Compostela co relato O valor
dos nomes.
Na modalidade de
adultos, o segundo premio foi para A
primeira palabra, un texto presentado pola química e divulgadora científica
Ángela Arnosa Prieto, veciña de Naraío (San Sadurniño) de 22 anos; e o terceiro
foi para Black Friday, de Eduardo
Cameselle Iglesias, vigués de 75 anos e enxeñeiro técnico xubilado.
Na modalidade
xuvenil, Martina Lois Cuns, estudante de bacharelato do Colexio La Salle de
Santiago de Compostela, mereceu o segundo premio por Un día máis; e Cristina Fojo Rubio, alumna do Colexio Calasanz
Padres Escolapios da Coruña, gañou o terceiro con O amigo mar.
O xurado tamén
premiou co segundo e o terceiro premio da modalidade de infantil os relatos A fada Every, de Alba Díaz Mera, alumna
de sexto de primaria do CEIP A Gándara de Narón; e O can enxesado, de Pablo Mirás Sánchez, estudante do mesmo curso no
CEIP de Rebordáns de Tui.
As nove persoas
premiadas recibirán diferentes premios de perfil tecnolóxico, libros e, no caso
dos primeiros e segundos premios, un dominio .gal gratuíto durante un ano. A
Real Academia e PuntoGal publicarán os textos seleccionados nas súas páxinas
web. Luzes tamén reproducirá unha escolma dos relatos participantes e
agasallará as persoas gañadoras na modalidade de adultos cun lote de
publicacións da revista.