Espazo Compartido da UDC lanza un vídeo para animar á comunidade universitaria no seu confinamento
mércores, 8 de abril do 2020
A
comunidade de estudantes e docentes da UDC está a impulsar
iniciativas para mitigar as consecuencias do Estado de Alarma e o
confinamento, poñendo o foco en achegar folgos, solidariedade e
ánimo ás pantallas dos nosos dispositivos. Sen ir máis lonxe, a
comunidade do programa Espazo Compartido da Universidade da Coruña
vén de elaborar un vídeo, Espazo Compartido en corentena,
dirixido a todo o colectivo universitario da UDC, ao
que lle envía unha mensaxe de ánimo e estímulo ao tempo que lle
transmite a súa propia percepción da situación de confinamento.
Segundo
apunta a coordinadora do curso e investigadora do Centro de
Investigación TIC (CITIC), Thais Pousada, “a adaptación á nova
realidade non é doada para ninguén, pero está claro que é un reto
en si mesmo porque nos está a preparar para asumir responsabilidades
no futuro e ter unha maior capacidade de resolución de problemas,
así como ter unha perspectiva diferente da aprendizaxe desde as
nosas casas”.
Dende
o Espazo Compartido engaden que amais do devandito vídeo, estanse a
poñer en marcha máis actividades para contribuír á continuidade
formativa, divulgativa, integradora e dinamizadora da UDC, por
exemplo clases e titorías virtuais para preparar ao alumnado na
futura inserción laboral. Esta
liña de actividade podémola consultar ao detalle no seu Facebook.
Para
quen non o saiba, Espazo Compartido é un programa promovido pola
Universidade da Coruña de formación en habilidades persoais,
sociais e competencias básicas, para a empregabilidade e o fomento
da inclusión laboral de persoas novas con discapacidade cognitiva.
Recibe o apoio da Fundación ONCE, do grupo Banco Santander -
Universia e do Consello Social da UDC.