Especialistas en comunicación e turismo mergúllanse no Camiño Norte ao seu paso por Lugo
xoves, 7 de febreiro do 2019
Os
expertos en turismo do ámbito estatal e internacional están a
coñecer estes días o Camiño Norte de Santiago, da man da
Deputación e da súa
iniciativa-itinerario Famtrip unha viaxe de irmandade polas
terras lucenses destinada entre outras cousas a facer comunidade
dixital arredor das mesmas. Na andaina participan até pasadomañá
un total de 16 expertos en turismo: influencers, comunicadores
e representantes de axencias especializadas.
O
obxectivo da experiencia é facerlles vivir o Camiño Norte e que
coñezan ao detalle o seu potencial, “co fin de dinamizar
turisticamente a contorna de cara ao próximo Xacobeo 2021 e
convertela nunha alternativa idónea ao masificado camiño Francés”,
sinala a Deputación.
Na
andaina participa o deputado de Turismo, Eduardo Vidal, quen xa
realizou parte do itinerario xunto aos expertos, salientando que
“este Famtrip ou viaxe de familiarización por terras lucenses do
Camiño do Norte é o mellor escaparate para impulsar este importante
produto turístico que atravesa a nosa provincia”. Tamén puxo o
foco na importancia de “vivir a experiencia en primeira persoa”,
unha das razóns de ser do Famtrip e que repercute
positivamente, engadiu, nun mellor coñecemento da zona por parte das
axencias de viaxes, o que achegará o destino a viaxeiros e turistas
de todo o mundo. Amais, dixo, “os xornalistas especializados en
viaxes difundirán nas súas reportaxes, con maior detalle, todos os
encantos e recursos naturais, histórico-culturais e gastronómicos
do Camiño do Norte ao seu paso pola nosa provincia”.
Vidal
tamén salientou a importancia do percorrido en si mesmo: “O Camiño
do Norte consolidouse no terceiro posto dos camiños, por detrás do
Camiño Francés e do Camiño Portugués; e en 10 anos foi quen de
triplicar o número de peregrinos sendo escollido por case 20.000
camiñantes na súa viaxe a Compostela”.
En
total son 16 representantes de axencias especializadas no Camiño de
Santiago e xornalistas viaxeiros os que asisten a este Famtrip
que organiza a Deputación de Lugo. A participación internacional
vén representada por: Go Camino de Bélxica, MAE Peregrina Tours de
Portugal; Ponte Atlántica Produçao de Brasil, Traveller 24.com de
Sudáfrica, Walk the Camino e Corazón Travel de Inglaterra. Como
representantes nacionais participan Revista Otros Destinos, Viajar,
Correos, La Razón, Go Travel e Spain is More.