Espérase que Apple presente o seu servizo de vídeo baixo demanda o día 25

mércores, 13 de marzo do 2019 Marcus Fernández

O vindeiro día 25 Apple ten programado un evento no Steve Jobs Theater en Cupertino que baixo o lema de It’s show time dá a entender que será a presentación do servizo de vídeo baixo demanda da compañía da mazá, como parece confirmar a convocatoria de numerosas celebridades e executivos do sector audiovisual.
Segundo Bloomberg, Apple estaría a traballar contra o reloxo para pechar acordos con numerosas compañías, para así poder contar cun amplo catálogo de películas e series de televisión, ou sexa, que non se limitaría ás súas producións orixinais ao igual que tamén fan plataformas como Netflix, Amazon Prime Video e HBO. Entre as compañías coas que Apple estaría a negociar figuran AT&T (propietaria da HBO), CBS (propietaria da rede Showtime) a canle Starz e outras, coas que podería pechar acordos este mesmo venres, a tempo para planificar o seu anuncio o día 25.
Cómpre lembrar que a aplicación de televisión que ten actualmente Apple nos EE.UU. permite acceder aos contidos de HBO, ou sexa, que a nova plataforma de Apple podería ter ligazóns con actuais plataformas de televisión de pagamento, mentres que axentes como Netflix é de esperar que se manteñan á marxe, por ter xa un volume moi importante.
Tamén é posible que se aproveite o evento para anunciar unha renovación de Apple News, aplicación que pasaría a incorporar contidos de revistas. Deste xeito Apple pasaría a ter 3 grandes servizos de subscrición (música, vídeo e publicacións) cumprindo co avanzado aos seus accionistas nos últimos meses.

PUBLICIDADE