Esri dota de tecnoloxía pioneira á nova cartografía dixital de Galicia

Diego Hidalgo, Industry Manager de Goberno de Esri España

O pasado mes de marzo foi dado a coñecer un novo instrumento para incrementar a información específica e inmediata da contorna na que vivimos: a Base de Datos Cartográfica de Galicia en formato SIX (Sistema de Información Xeográfica). Trátase dun recurso abeirado ao Plan galego de cartografía e información xeográfica que foi impulsado pola Consellería de Medio Ambiente e desenvolvido en parte pola empresa Esri, sendo o resultado final “unha cartografía dixital pioneira que abrangue unha gran cantidade de información temática nun formato normalizado, á que se pode acceder de forma aberta e gratuíta, sen restricións e con total transparencia”. Tanto Medio Ambiente como Esri engadiron na súa presentación que se trata da primeira vez que Galicia conta cun recurso así, unha ferramenta para ser integrada en infraestruturas de datos espaciais ou implementada en servidores web de mapas. Co fin de afondar un pouco máis nestas funcións e posibilidades tivemos ocasión de falar con Diego Hidalgo, Industry Manager de Goberno de Esri España.
-A vosa empresa, Esri, está detrás da materialización da Base de Datos Cartográfica de Galicia en formato SIX (Sistema de Información Xeográfica). En que consistiu exactamente o voso traballo?
-Os labores de produción cartográfica da base topográfica realizounas directamente o Instituto de Estudos do Territorio (IET) da Xunta de Galicia. O noso labor foi facilitarlles as ferramentas necesarias, a través do acordo marco que temos coa Xunta a través da axencia AMTEGA, o asesoramento para poder levar a cabo os devanditos traballos, así como a presentación dos mesmos.
-Que vantaxes creedes que pode reportar esta base de datos para a cidadanía galega? Que cousas nos vai permitir facer, como cidadáns ou como técnicos?
-En primeiro lugar, os cidadáns galegos beneficiaranse dunha mellor xestión da súa contorna, tanto por parte das administracións públicas como das empresas que operen na Comunidade, pois ambas poderán contar con datos xeográficos coherentes e unificados. Moitas das grandes melloras (por exemplo, a xestión da auga) pasarán inadvertidas para o cidadán, pero estarán presentes. Hoxe en día, temos máis datos que nunca, pero só usándoos coherentemente, grazas á tecnoloxía, poderemos coñecer mellor a nosa contorna. A optimización de recursos, máis transparencia e máis participación, son as claves deste proxecto.
-Na presentación da plataforma fixemos fincapé desde Código Cero na utilidade da mesma para coñecernos mellor a nós mesmos. Creedes que é así?
-Efectivamente. A plataforma consolidará a vasta cantidade de información dispoñíbel a través dun único acceso. Desta maneira, os datos da xeografía galega estarán consolidados. Seremos capaces de confiar nesta información sen temor a trabucarnos. Isto redundará na posibilidade de tomar decisións máis efectivas, baseadas na evidencia. Podemos acceder en todo momento a información válida, por parte de empresas, xestores públicos ou particulares.
-No acto de activación da base de datos tamén se destacou o feito de que se trate dunha ferramenta pioneira, ou sexa, que abre un antes e un despois na nosa maneira de acceder á información cartográfica galega. En que sentido exactamente é pioneira?
-O máis relevante é que pasamos dunha cartografía clásica a unha produción cartográfica baseada en información xeográfica, adaptada á era dixital. As facilidades para descargar capas de información, analizalas, tratalas e xerar mapas ou aplicacións permitirán aos diferentes usuarios interactuar co territorio dunha forma sinxela.
-É unha ferramenta propia do seu tempo? Que características das correntes actuais de transparencia e participación considerades que reúne?
-Totalmente. Hoxe en día, temos máis datos que nunca. Segundo IBM, o 90% dos datos existentes foron creados en apenas os dous últimos anos da nosa historia. E cada vez máis, as administracións públicas son sensíbeis ás peticións de meirande transparencia e participación da cidadanía. Por tanto, esta base cartográfica foi despregada nun momento oportuno. Poder pór ao alcance do cidadán toda a información posíbel é un obxectivo loábel, que require de ferramentas que garantan a seguridade e o funcionamento deste fluxo de datos. Ademais, as cidades son cada vez máis intelixentes. É dicir, apóianse na tecnoloxía para garantir o seu desenvolvemento sustentábel, unha mellor calidade de vida, unha meirande eficiencia ao xestionar recursos e para fomentar a participación cidadá. Ferramentas como esta base cartográfica son a pedra angular dunha estratexia que sitúa os datos na cerna da toma de decisións á hora de xestionar as nosas cidades, fomentando a colaboración entre administracións públicas, cidadáns e empresas.
-Faládenos un pouco da vosa empresa, cales son os seus principais ámbitos de actividade, as súas liñas estratéxicas, os ámbitos onde destaca...
-Esri é unha empresa especializada no desenvolvemento de mapas intelixentes, tamén coñecidos como Sistemas de Información Xeográfica. Os mapas intelixentes son ferramentas cartográficas dixitais que permiten capturar, analizar, xestionar e visualizar datos para tomar decisións de maneira máis áxil e eficaz. As aplicacións dos SIX son practicamente ilimitadas, podendo ser implementadas en diversos sectores como as administracións públicas, defensa e salvamento, augas, emerxencias, finanzas, loxística, telecomunicacións ou enerxía, entre outros.
A nosa tecnoloxía, coñecida como The Science Of Where, permite resolver problemas complexos de maneira sinxela a través da localización. Tanto usuarios de administracións públicas como empresas privadas poden utilizar os nosos mapas mesmo aínda que teñan coñecementos técnicos limitados. A nosa ferramenta, a Plataforma ArcGIS, é a máis estendida do mundo e hoxe en día é o estándar na materia, especialmente en contornas profesionais. Está en constante evolución e é accesíbel tanto desde escritorios como en liña. Para desenvolvedores, a Plataforma ArcGIS tamén fornece ferramentas que lles permiten crear aplicacións de seu.
-Pódese dicir que Esri quedou satisfeita destes traballos de cartografía dixital realizados coa Consellería de Medio Ambiente?
-Sen dúbida. Estamos seguros de que esta base cartográfica axudará a manter a coherencia dos datos xeoespaciais en Galicia, garantindo a calidade da produción xeográfica na Comunidade. Nunha contorna no que cada vez hai máis datos dispoñíbeis, é importante ter a certeza de que son os correctos, en todo momento.