Esta semana desenvolverase unha nova edición coruñesa da OSHWDem

Os interesados na cultura Maker terán o vindeiro sábado na Domus da Coruña unha nova edición das xornadas demostrativas de Open Source Hardware, OSHWDem que botaran a andar en 2012, e que, seguindo a filosofía BarCamp sobre electrónica e Open Source Hardware permiten que o público poida facer un achegamento a un ámbitos tecnolóxicos de maior dinamismo nos últimos anos grazas á emerxencia de tecnoloxías como as impresoras 3D ou a robótica, que conseguen estar case ao alcance de calquera.
Este evento está organizado pola asociación BricoLabs, que semanalmente xunta a interesados en deseñar, construír e probar todo tipo de trebellos propostos polos propios participantes, e que nesta feira contan con convidados doutras partes da península, que amosarán os seus proxectos e impartirán algúns pequenos relatorios. Neste encontro poderanse ver modernas impresoras 3D de fabricación propia (incluíndo impresoras encartables e unha impresora fabricada con materiais reciclados), un dron subacuático de fabricación galega ou un proxecto de creación de próteses para membros amputados baseándose en tecnoloxía aberta.
A OSHWDem completarase durante esta semana con obradoiros de balde de placas electrónicas de robótica e de música electrónica, e como novidade, este ano organízase unha competición de robótica pensada especialmente en estudantes de segundo ciclo da ESO e Bacharelato, que o vindeiro xoves loitarán por gañar postos na Liga Nacional de Robótica de Competición (LNRC).
A organización prevé superar o milleiro de asistentes da anterior edición, e como reclamo no seu programa figuran atractivos concursos como carreiras de robots sigue liñas e batallas de Sumo Robot, así como outras dúas novas categorías de competición: robot resolve labirintos e batallas de robots.