Este 19 de xullo volven as katas de Embedded Rust da Industriosa

Este mércores 19 de xullo, de 18:30 horas, volven as katas de Embedded Rust que organiza e acolle en Vigo A Industriosa. Desta vez a sesión de desenvolvemento aberto virá con algunhas novidades, xa que se revisará o código feito por algúns membros das últimas katas e así “tratar de facer algunha mellora e aprender dunha aplicación real”. O proxecto en cuestión podemos visualizalo na web de GitLab.
Contarase coa presenza activa dos contribuidores do proxecto para que presenten os detalles do mesmo e poidan resolver as dúbidas das persoas participantes, que poderán formalizar a súa inscrición de xeito gratuíto a través de Meetup.
Esta actividade está patrocinada pola Xunta de Galicia e pola Axencia Para a Modernización Tecnolóxica (AMTEGA).
As katas da Industriosa son un evento informal e aberto a calquera persoa que se anime a “participar e compartir unha hora e media de programación, café e ou té”.
Inspirados nos katayunos, dojos e actividades semellantes, o formato das katas da Industriosa teñen un formato de grupos de entre dúas e tres persoas para resolver un reto de programación, compartir e mellorar as nosas habilidades de Python ou Embedded Rust.